Kiristerdi arttyrý baǵdarlamasyn ázirleý, jeke ınvestısııalardy tartý, adamı kapıtaldy damytý, sondaı-aq satyp alýdy júzege asyrýdyń jańa tártibi. Premer-Mınıstr Álıhan Smaıylov «Atameken» UKP IH sezinde osy jáne basqa da máselelerdi kóterdi, dep habarlaıdy Premer-Mınıstrdiń baspasóz qyzmeti.
Mınıstrler kabıneti basshysynyń habarlaýynsha, qazirgi ýaqytta arnaıy Halyqtyń tabysyn arttyrý baǵdarlamasy ázirlenip jatyr. Onyń aıasynda kiristerdegi teńgerimsizdikti teńestirý, aýqymdy jumyspen qamtamasyz etý, ındýstrııalyq jáne aýyl sharýashylyǵy jobalaryn iske asyrý, óndiristerdi tehnologııalyq jańǵyrtý, adamı kapıtaldy damytý jáne t.b. boıynsha sharalardy iske asyrý josparlanyp otyr.
Sonymen qatar Á.Smaıylovtyń aıtýynsha, el Prezıdentiniń tapsyrmasyn oryndaý maqsatynda Úkimet «Samuryq-Qazyna» qorymen birlesip, Satyp alýdy júzege asyrýdyń jańa tártibiniń jobasyn ázirledi. Bul olardyń ashyqtyǵyn arttyrýǵa baǵyttalǵan jáne sybaılas jemqorlyq táýekelderin barynsha azaıtady. Sondaı-aq atalǵan mehanızm jergilikti óndirýshiler men jetkizýshilerdi qoldaýǵa, satyp alý prosesin ońaılatýǵa jáne bıznes kedergilerdi joıýǵa baǵyttalǵan, sonyń nátıjesinde, 10 myń ShOB sýbektisine kómek kórsetiledi.
«Otandyq taýar óndirýshilerden 400 mlrd teńgege 10 myńǵa jýyq taýar pozısııasy satyp alynady. Budan ózge, zań júzinde ashyqtyqty arttyryp, jer qoınaýyn paıdalaný quqyǵyn berý jáne kelisimsharttar talaptaryn ózgertý rásimderin jeńildetý josparlanyp otyr», dedi Á.Smaıylov.
Premer-Mınıstr bıznesti qoldaý, ınvestısııalyq ahýal men bıznes-ortany jaqsartý máselelerine erekshe nazar aýdardy. Atalǵan baǵyttar aıasynda búgingi tańda memleket salyqtyq yntalandyrýlar usyndy, kásipkerlik sýbektileriniń oblıgasııalaryn kepildendirý quraldary ázirlendi, mono-shaǵyn qalalarda jáne aýyldyq eldi mekenderde jeńildikti mıkrokredıtteý usynylýda.
Odan ári damytý sheńberinde jańadan qurylǵan Otandyq kásipkerler keńesimen birlesip, ınvestısııalyq ahýal men bıznes-ortany jaqsartý jónindegi sharalar iske asyrylatyn bolady. Sonymen qatar jeke ınvestısııalarǵa basa kóńil bólinetin Investısııalyq saıasattyń jańa tujyrymdamasy ázirlendi.
Sondaı-aq ol memlekettiń jekemenshik ınstıtýttyń beriktigine jáne zań ústemdigine kepildik berýiniń, sondaı-aq bızneske ınfraqurylymdy teń qoljetimdi etýiniń mańyzdylyǵyn atap ótti.
Á.Smaıylovtyń aıtýynsha, aldaǵy ýaqytta Úkimet jumysy óńirlerdegi shaǵyn jáne orta bızneske basymdyq bere otyryp, memlekettik qoldaý sharalaryn usynýdyń tıimdiligi men ashyqtyǵyn arttyrýǵa baǵyttalady.
Sóz sońynda Á.Smaıylov elimizde ekonomıkany qalpyna keltirý men ony damytý draıverine aınalatyn jobalar ázirleý qajet ekenin atap ótti.
Premer-Mınıstr sezd delegattaryn Prezıdent alǵa qoıǵan mindetterdi iske asyrýǵa jáne jaqynda qurylǵan Úkimet janyndaǵy Otandyq kásipkerler keńesiniń jumysyna belsendi aralasýǵa shaqyrdy.
Eske sala keteıik, ótken jyly vıse-premer retinde Á.Smaıylov apta saıyn shaǵyn jáne orta bıznesti damytý jóninde keńester ótkizgen bolatyn. Osy kezeńde qyzmettiń 18 baǵyty boıynsha 160-tan astam sharýashylyq máseleleri qaraldy, qozǵalǵan problemalardyń 75%-ǵa jýyǵy sheshimin tapty. Taǵy 250 másele bıylǵy 17 aqpanda memlekettik organdar men Palata ókilderimen ótken keńeste shuǵyl túrde qaraldy.