Syr boıynda serpilis bar

Keshe Premer-Mınıstr Serik Ahmetov bastaǵan delegasııa Qyzylorda oblysyna keldi. Delegasııanyń jumysy áýe­jaıdan bastalyp ketti. Sebebi, aldaǵy jyldarda Qyzylorda áýejaıynyń termınaly ha­lyqaralyq talaptarǵa sáıkes­ten­dirilip, qaıta salynady. Búginde áýejaı bir saǵatta 150 adamǵa ǵana qyzmet kórsetýge qaýqarly. Onyń ústine aımaqqa qatynaıtyn reısterdiń de sany az. Sondyqtan termınaldy qaıta jasaqtaý máselesi týyndap otyr. Alǵashynda, ter­mınal qurylysyn jeke ınves­torlarǵa berý kózdelgen. Degen­men, bul oı iske aspady. Endi Qyzylorda oblysynyń ákimdigi «Qazaqstan temirjoly» ulttyq kompanııasymen kelisimge kelmek. Aldaǵy sáýir aıynda eki jaq memorandýmǵa qol qoıady. Jańa áýejaıdyń qury­ly­sy aıaqtalǵannan keıin onyń ju­­mysy da jandanady. Qazirdiń ózinde áýe kompanııalary Más­keý, Ystambul, Dýbaı sekildi qalalarǵa jańa reıs­ter ashýǵa daıyn ekenin jetkizgen. Al jańa termınal saǵatyna 250 adamǵa qyzmet kórsete alatyn bolady. Serik Nyǵmetuly áýejaıda termınal qurylysynyń jobasymen tanysyp, saparyn odan ári jalǵastyrdy. Munan keıin delegasııa Syr­­­darııa aýdanyna qarasty Naǵı Ilııasov aýdanyndaǵy «Maǵ­jan jáne K» JShS-niń tu­qym sha­rýashylyǵynda bolyp, onda aýyl sharýashylyǵy taýarla­ryn óndirýshilermen kezdes­ti. Bıyl qyzylordalyq dıqandar 160 myń gektar jerge egin egedi. Onyń 76,6 myń gektary kúrish salysyna tıesili. Qazaqstannyń Eńbek Eri, «Abzal jáne K» tolyq seriktestiginiń dırektory Abzal Eralıev kúrish sharýashylyǵy týraly baıan etti. О́ńirde óndirilip jatqan kúrish kólemi, sharýashylyqqa engizilgen jańa tehnologııalar men ónim sorttary týraly málimdedi. Al aýylsharýashylyq basqarmasynyń bastyǵy Talǵat Dúısebaev kóktemgi naýqan týraly, egin egýge daıyndyq jaıyn japsarlady. Eń qýanarlyǵy, kóktemgi egin kezinde janar-jaǵarmaı qymbat baǵaǵa alynbaıdy. Aldyn ala kelisim boıynsha sharýalar janar-jaǵarmaıdy arzan baǵaǵa satyp alady. Sonymen qatar, keıingi jyldarda Qyzylorda oblysynda aýylsharýashylyq ónimin óndirý edáýir óskeni aıtyldy. Bul tarapta Elbasynyń aýyl sharýashylyǵyna erekshe kóńil bólip, Úkimettiń tıisti qoldaýdy der kezinde kórsetip otyrǵany kóp kómek berip otyr. Aımaq ekonomıkasynyń ósýine, áleýmettik jaǵdaıdyń turaqty damýyna «Baıqońyr» áleýmettik-kásipkerlik korpo­rasııasynyń qosyp otyrǵan úlesi de zor. Serik Nyǵmetuly «Baıqońyr» ÁKK jumysymen de tanysty. Qyzylorda oblysy ákiminiń orynbasary Rzaqul Nurtaev mal sharýashylyǵyna qatysty baıandama jasady. Táýelsizdiktiń alǵashqy jyldarynda mal basynyń azaıyp ketkeni anyq. Sońǵy ýaqytta aımaq 1990 jylǵy kórsetkishke jetken. Qazirdiń ózinde óńirde iri qara malynyń basy artqan. Aımaq basshylyǵy oblysta ýaq maldan góri iri qarany ósirgen qolaıly ekenin aıtady. Sondyqtan iri qara malyn kóbeıtýge basymdyq berilgen. Úkimet basshysy bul baǵyttaǵy jumysty odan ári damyta berý kerektigin aıtty. Aımaqta asyltuqymdy mal sharýa­shylyǵymen aınalysyp otyrǵan «RZA» aksıonerlik qoǵam­nyń basshysy Samurat Iman­dosov sharýashylyq jaıynda keńinen málimet berdi. «Elbasy aýylsharýashylyq salasyna asa úlken kóńil bólip otyr. Sondaı-aq, elimiz­­­de «Agrobıznes-2020» baǵ­dar­lamasy da jemisti jumys jasap jatyr. Osy baǵdarlama aıasynda 2020 jylǵa deıin atalǵan salaǵa 3 trıllıon teńge bólinbek. Al bıyl aýyl sharýashylyǵyna 194 mıllıon teńge beriledi», – dedi Premer-Mınıstr sharýashylyq ókil­derimen kezdesýinde. Munan soń mártebeli meımandar oblysta salynyp jatqan «Ana men bala ortalyǵynda» boldy. Keıingi jyldary aımaqta ana men bala ólimi azaıǵan. Ol úshin densaýlyq saqtaý salasy boıynsha birtalaı jumys atqaryldy. Sonyń biri osy ortalyq. Al oblystyq sport jáne deneshynyqtyrý basqarmasynyń basshysy Sadyq Mustafaev Syr sportynda serpilis bar ekenin aıtady. Aımaqta «Muz aıdyny», «Nursát» tennıs ortalyǵy sekildi sporttyq keshenderdiń salynýy da bul salanyń damýyna serpin berse kerek. Úkimet basshysy «Muz aıdynynyń» jumysyn kórip, aımaqta atqa­rylǵan sharýalar jaıynda maǵlumat aldy. Eń bastysy, zamanaýı talaptarǵa saı keletin sport keshenderi tek oblys ortalyǵynda ǵana emes, shalǵaı jatqan aýyldarda da salynady. Bul aýylda jatqan talaı talanttyń jolyn ashady dep senemiz. Sondaı-aq, Serik Ahme­­tov «Smart Rubber» JShS-niń eski avtomobıl dóńge­­lek­­­­terinen turmysqa qa­jetti túr­li zat jasaıtyn zaýyt­qa bardy. Kásiporynda re­zeń­ke qıyndylarynan aýyl sha­rýashylyǵynda qold­a­ny­latyn tam­shylatyp sýa­rý ádisine kerek­­ti tútikshe de shy­ǵarady. Jo­­ba­ny germa­­­nııa­lyq «Water Future Systems GmbH» kompa­nııasy árip­testik baǵytta atqa­­ryp jatyr. Qysqasy, bul zaýyt eshkim­ge qajetsiz jatqan kólik dóńge­lekterin óńdep, odan paıdaly zat jasap shyǵarady. Jumys saparynyń sońynda Úkimet basshysy oblystyq ákim­dikte qorytyndy jıyn ót­kizdi. Jıyn kezinde Serik Ahmetov óńir ómirinde ózge­ris baryn atap aıtty. Al Qy­zylorda oblysynyń ákimi Qyrymbek Kósherbaev atqa­rylǵan jumystarǵa sholý jasap, bolashaqta iske asatyn sharýa­lardy atap aıtyp, túıtkildi máseleler tóńireginde de sóz qozǵady. Oblys ekonomıkasyn damytý úshin naqty konsorsıýmdar quryldy. Osynyń negizinde aýyl sharýashylyǵy, ejelgi atakásip – balyq sharýashylyǵy erekshe ekpinmen damyp keledi. Qyzylorda oblysynyń ekonomıkasy negizinen munaı men ýranǵa táýeldi. Sondyqtan óńir ekonomıkasyn ártaraptandyrý maqsatynda metallýrgııa klasterin qolǵa alý kózdeldi. Bul baǵytta da naqty jumystar bastalyp ketti. – Memleket basshysy eli­mizdiń 2050 jylǵa deıin­gi uzaqmerzimdik damý baǵyt­­ta­ry men alǵa qoıyl­ǵan maqsatqa qol jetkizýdiń naq­ty qadamdaryn aıqyndap berdi. Bul rette ındýstrııalandyrý­dy kúsheıtýge, elimizdiń agro­ónerkásiptik keshenin damytýdy ınnovasııalyq súrege salýǵa, shaǵyn jáne orta bıznesti órken­detýge erekshe mán berilmek. Biz búgin osy maqsattarǵa qol jet­kizýde Elbasy bergen tapsyr­ma­lardy oryndaýǵa óńirde bar­lyq qajetti múmkindikter men resýrstardyń barlyǵyna taǵy da kóz jetkizdik. Jalpy, oblysta aýqymdy jumystar atqarylýda. Ekonomıkanyń ártaraptandyrýǵa arnalǵan bastamalar bar. Árıne, óńir basshysy jaqsy bastamalardy kóterip otyr. Osyǵan oraı, Úkimet tarapynan tıisti qol­daýdyń kórsetiletinin aıtqym keledi, – dedi Serik Nyǵmetuly. Úkimet basshysynyń Syr boıyna sapary sátti boldy dep oılaımyz. Sebebi, Serik Nyǵ­metuly jasalǵan jumysqa oń baǵasyn berip qana qoımaı, aımaq basshy­­­lyǵynyń bastamalaryn qoldaı­tynyn da bildirdi. Erjan BAITILES, «Egemen Qazaqstan». Qyzylorda oblysy.