Oblys ortalyǵyndaǵy Sultanmahmut Toraıǵyrov atyndaǵy kitaphanada «Shyǵystyń rýhanı murasy» atty kórme uıymdastyryldy. Buǵan deıin oblys ortalyǵyna Semeıdiń F.M.Dostoevskıı atyndaǵy ádebı-memorıaldyq murajaıy da kóshpeli kórmemen kelip ketken edi. Endi, mine, eki kún boıy pavlodarlyq oqyrmandar Semeıdiń Abaı atyndaǵy kitaphanasy ákelgen kitap kórmesin qyzyqtady.
Kórmeniń alǵashqysy «Altaı-Ertis kitaphanasy» tizbegi boıynsha Shyǵys Qazaqstan oblysynyń osy kúngi aqyn-jazýshylarynyń shyǵarmashylyǵyna arnaldy. Ekinshisi, «Ǵasyrlar únindeı baılyq» dep atalady. Qordan alynǵan, sırek kezdesetin, qolǵa túse bermeıtin 200-ge jýyq qundy ádebıetter jıyntyǵymen tanystyrdy. Kórme sórelerinde Mıhaelıs, Obrýchev, Álıhan Bókeıhanov, Nıkolaı Konshın, Dreper, Darvın, Spenser, Bokldiń jazbalary, basqa da kitaptar, ensıklopedııalyq sózdikter tur. Bul kitap, jazbalardyń talaıyn zamanynda Abaı qolyna ustap oqyǵan eken. Únsiz, taǵzym etip turyp qalasyń.
Sonymen qatar, kórmege 1881 jyly Qazan men Sankt-Peterbýrgte basylyp shyqqan Quran, 1829 jyly basylyp shyqqan Gomerdiń «Ilıadasy», dalalyq ólke zertteýleri, Bókeı ordasynyń qorǵandary, zertteýshi Nıkolkonyń Balqashqa sapary jaıly kóne jazbalar qoıylypty. Osydan 130 jyl buryn ashylǵan Abaı atyndaǵy kitaphana tarıhynyń ózi bir shejire. Bul kórme oblystardyń óńiraralyq ádebı-mádenı baılanystary aıasyndaǵy rýhanı-tanymdyq maqsatqa arnaldy.
– Ǵasyrlyq tarıhy bar kitaphanamyzda áıgili tarıhı tulǵalardyń, Semeıge kelgen áıgili adamdardyń izi qalǵany belgili. Kórmege qoıylǵan bul kitaptardyń barlyǵy da qundy, árbir oqyrmandy qyzyqtyratyn rýhanı dúnıeler, – deıdi kitaphana dırektory Aıgúl Shaımardanova.
Kórmeniń taǵy bir is-sharasy «Semeı óńiriniń tanymal tulǵalary» atty tanymdyq aqparatqa arnaldy. Oqyrmandarǵa bıylǵy jyly mereıtoılary atalyp ótetin halqymyzdyń birtýar ul-qyzdary Jánibek Kármenov, Aıtkesh Tolǵanbaev, Bıbigúl Tólegenova, abaıtanýshy Tóken Ibragımov týraly beıne-kórinister kórsetildi.
Farıda BYQAI,
«Egemen Qazaqstan».
Pavlodar oblysy.