Qyzylorda oblysy Jańaqorǵan aýdandyq prokýratýrasy alkogolızmge, nashaqorlyq pen ýytqumarlyq dertine shaldyqqan aýrýlardy eriksiz emdeýde aýdandyq ishki ister bólimi qyzmetkerleriniń óreskel zań buzýshylyqtarǵa jol bergenin anyqtady.
Azamatsha J.Kóbenova balasy A.Dosalıevtyń sprıtti ishimdik iship alyp, otbasyna tynyshtyq bermeıtinin, araqqa salynyp ketkenin jáne óz erkimen qoıa almaıtynyn kórsetip, aýdandyq ishki ister bólimine shaǵymdanady. Osy aryz negizinde aýdandyq ishki ister bólimi ony araqqumarlyqtan eriksiz emdeý mekemesine jiberý týraly aýdandyq sotqa usynys keltiredi. Nátıjesinde sottyń 2013 jylǵy 4 jeltoqsandaǵy qaýlysymen Asylhan Dosalıev Qyzylorda qalasyndaǵy medısına táýeldiligi ortalyǵyna 6 aı merzimge eriksiz emdeýge jiberilgen.
Al Qazaqstan Respýblıkasynyń «Alkogolızmge, nashaqorlyq pen ýytqumarlyq dertine shaldyqqan aýrýlardy eriksiz emdeý týraly» Zańynyń 3-babyna saı, alkogolızmge shaldyqqan dep tanýdy Densaýlyq saqtaý mınıstrligi belgilegen tártippen tıisti medısınalyq kýálandyrýdan keıin memlekettik densaýlyq saqtaý uıymdary júzege asyrady. Atalǵan zańnyń 4-babynda sondaı-aq alkogolızmge shaldyqqan aýrýlardy eriksiz emdeýge jiberýdi rásimdeýdi aýrý týystarynyń, ishki ister, prokýratýra organdarynyń bastamasymen medısınalyq qorytyndy bar bolǵan jaǵdaıda memlekettik densaýlyq saqtaý uıymdary júzege asyratyny aıqyndalǵan.
Alaıda, A.Dosalıevty eriksiz emdeýge jiberý densaýlyq saqtaý mekemesi emes, ishki ister organy rásimdep, aýdandyq sottyń zańsyz qaýly qabyldaýy negizinde júzege asyrǵan. Aýdandyq ishki ister bóliminiń A.Dosalıevty onyń anasynyń aryzyna sáıkes, maskúnemdikten emdeý mekemesine eriksiz jiberý týraly sotqa usynys berýge zańmen kózdelgen ókilettigi bolmaǵan.
Osy tektes zań buzýshylyqtar, azamattar J.Dáýkenovke, E.Apellevke, A.Altynbekovke, S.Ádilovke, R.Shalqybekovke, E.Kósherbaevqa, M.Fofanovqa, N.Álıge jáne A.Nurálıevke qatysty qabyldanǵan qaýlylarynda da oryn alǵan. Osynyń saldarynan, atalǵan azamattardyń quqyqtary men bostandyqtaryna eleýli túrde nuqsan keltirilip, olardyń konstıtýsııalyq quqyqtary óreskel buzylǵan.
Osyǵan sáıkes, Jańaqorǵan aýdandyq prokýratýrasy aýdandyq ishki ister bólimine zańdylyqty buzýshylyqty joıý jóninde usynys engizip, nátıjesinde kináli qyzmetkerlerdiń tártiptik jaýapkershilikteri qaraldy.
Aqmaral Janesenova,
Jańaqorǵan aýdany prokýrorynyń kómekshisi.
Qyzylorda oblysy.
Foto: vse-znat.ru.