Beısenbi kúni ońtústik astanada Almaty qalasynyń damýyna baılanysty keńes ótkizgen Qazaqstan Prezıdenti Nursultan Nazarbaev jol-kólik oqıǵalarynyń kóbeıýine alańdaýshylyq bildire kelip, jol-kólik oqıǵasyn jasaǵan tanymal kisilerdiń balalaryn zańǵa saı qatań jazalanýlary tıis ekenin aıtty. Bul týraly Aqordanyń saıty habarlady.
«Erekshe atap ótkim keledi – tanymal adamdardyń balalary men týystarynyń qatysýymen bolatyn jol-kólik oqıǵalary az emes. Zańnyń aldynda bári teń, sondyqtan mundaı jaǵdaılarda balalardy da, ata-analaryn da meılinshe qatań jazalaý qajet», – dedi Prezıdent.
Memleket basshysy qaladaǵy krımınogendi ahýalǵa toqtalyp, Almatyda 53 myń qylmys tirkelgenin, onyń 80 paızynyń ashylǵanyn, biraq jasóspirimder arasynda qylmystyń artyp otyrǵanyn aıtty. Soǵan baılanysty ákimdiktiń ótinishimen ishki ister departamentiniń shtaty aıtarlyqtaı ulǵaıtyldy, degenmen 500 oryn áli bos kúıinde. Prezıdent Almaty turǵyndary men qonaqtarynyń qaýipsizdigin qamtamasyz etýdi tapsyrdy.
Jıyn barysynda qalanyń 2013 jylǵy áleýmettik-ekonomıkalyq damý qorytyndylary men aldaǵy kezeńge arnalǵan josparlary qaraldy. Memleket basshysy Nursultan Nazarbaev megapolısti damytý máseleleri árqashan memlekettiń nazarynda bolatynyn aıtty.
Jıyn sońynda Almaty ákimi Memleket basshysynyń qoldaýy arqasynda qala ekonomıka men áleýmettik salanyń barlyq sektorynda damý qarqynyna ıe bolǵanyn jáne osy qarqyndy saqtaý úshin kúsh salynatynyn atap ótti.
Murat Aıtqoja.
Derekkóz: Aqordanyń saıty.
Foto: www.uralskweek.kz.