Halqymyzda «Amanatqa qııanat jasamaý» qaǵıdaty ómirlik temirqazyq ustanymǵa aınalǵan. Amanat sóziniń maǵynasy tereńde. Babadan qalǵan jer de, atadan mura bolǵan til men óner de, mádenıet, ádebıet, tarıh bári-bári jahandanýdyń yzǵarynan saqtalyp kelesi urpaqqa tutas jetkizý – amanat. Bul partııamyzdyń endigi aýmaly-tókpeli zamandaǵy negizgi mindeti. Búgin Nur Otan partııasynyń kezekten tys HHII sezinde Memleket basshysy Qasym-Jomart Toqaev partııanyń Májilistegi Fraksııa jetekshisi Erlan Qoshanovtyń partııa ataýyn «Amanat» dep aýystyrýyn qoldady.
1 naýryz – Alǵys aıtý jáne partııanyń 23 jyl buryn qurylǵan kúni. Jaqsylyqqa tilektestikti, bir-birine janashyrlyqty jáne úlken men kishi arasyndaǵy qamqorlyqty izgileıtin bizdiń qoǵamda yntymaqtyń arqasynda qańtardaǵy syn saǵatta memlekettigimiz ben tutastyǵymyz saqtaldy. Kóktemniń jańarý kúninde partııa jumysynyń mazmunyn qaıta qaraý, ony syn turǵysynan oı eleginen ótkizýdiń sımvoldyq máni osynda.
Memleket basshysy Qasym-Jomart Toqaev «Amanat» partııasynyń baǵyt-baǵdaryn, jańa mindetterin aıqyndady. Jańa 5 mindet – «Amanat» partııasynyń barlyq reformalaryna uıytqy bolyp, onyń árdaıym el múddesin qorǵaıtyn naǵyz halyqtyq partııa bolyp qalýy, el birligin nyǵaıtýdaǵy jáne áleýmettik ótkir máselelerdi oń sheshetin negizgi saıası kúsh retinde saqtalýy qajet. Atap aıtqanda, partııa apparatynyń tıimdiligin arttyrý, azamattardyń múddeleri men partııanyń ashyqtyǵyna yqpal etý, Májilis pen máslıhattardaǵy fraksııalardyń qyzmetin jandandyrý, saıası kadrlardy daıarlaý mindetteri tur.
Partııa elimizdiń jańa kezeńge qadam basqan ýaqytymen tuspa-tus modernızasııalanady. Qazir búkil álemdegi ahýal ózgerip jatyr. Memleket basshysy: «Zaman, qoǵam, adam ózgerip jatqanda, partııanyń ózgerýi – zańdylyq. Bul – ýaqyt talaby. Osyǵan oraı jańa ǵana aıtylǵandaı, saıası uıymnyń ataýyn «Amanat» dep ózgertý usynyldy. Jasyratyn eshteńe joq, men de bul máselege baılanysty pikirtalasqa qatystym. Birneshe usynys boldy, sonyń ishinen «Amanat» degen ataýǵa toqtadyq. Bul – elimiz úshin de, ultymyz úshin de aıryqsha máni bar kıeli uǵym», dedi.
«Amanat» – ádilet partııasy, el birligi partııasy, irgeli ilgeriletýshi, halyqtyń pikiri men tilegin tyńdap, azamattarymyzdyń múddesi jolynda áreket etetin partııa. Barshamyz Memleket basshysynyń «Jańa Qazaqstandy» qurý ıdeıasynyń aıasynda birigip, toptasýdamyz. Bul jańa maqsattar men naqty mindetter júkteıdi. Zaman, ýaqyt, dáýir ózgerip, talap jańarǵan sátte árqaısysymyz isimizben elimizdi damytýǵa úles qosýymyz qajet. Jańa qundylyqtarmen qatar kúrdeli syn-qaterler paıda bolýda. Memleket basshysy Ýkraına tóńireginde bolyp jatqan oqıǵalar aıasynda negizgi ustanym memleketimizdiń qaýipsizdigi, egemendigi men aýmaqtyq tutastyǵyn qamtamasyz etý ekenine basa toqtaldy.
Prezıdentimiz Qasym-Jomart Kemelulynyń: «Men úshin eń basty qundylyq – Qazaqstannyń Táýelsizdigi. Memleket basshysy retinde elimizdiń qaýipsizdigi men halqymyzdyń amandyǵyn qamtamasyz etý úshin qoldan kelgenniń bárin jasaımyn. Jaýapkershilik júgi qanshama aýyr bolsa da, odan esh qaımyqpaımyn», degen sózderi sezd qatysýshylaryna zor senim uıalatty. Elimizdiń damýyna úles qosý, jaýapkershilik sezinip, aıanbaı eńbek etý – bárimizge ortaq mindet. Týǵan Otanymyzdyń keleshegin kemeldi etý jolyndaǵy murattarymyz baıandy bolsyn.
Májilis depýtattary Memleket basshysynyń aldymyzǵa qoıǵan barlyq tapsyrmalaryn tezirek oryndaýǵa, partııa jumysyn jandandyryp, rólin kúsheıtýge atsalysamyz. Halyq naqty ózgeristerdi kútip otyr. 16 naýryzda saıası reformalardyń jańa baǵdarlamasy usynylady.
Juldyz SÚLEIMENOVA,
Májilis depýtaty