Búgin partııa Amanat degen jańa ataýmen jańǵyrýdyń jaýapkershiligi mol ashyq alańyna qadam basty. Partııa Tóraǵasy Qasym-Jomart Kemeluly óz sózinde partııanyń ataýyn aýystyrý – qabyrǵadaǵy jazýlardy almastyrý ǵana emes, jańa tuǵyrnama, jańasha jumys nátıjesi arqyly halyqtyń shynaıy senimi men qurmetine ıe bolý ekenin eskertti.
Amanat – qasıetti, salmaǵy men jaýapkershiligi aýyr uǵym. Babam qazaq kúndelikti ómirde «Amanat» sózin qalaı bolsa solaı, qısapsyz qoldana bermegen. Sebebi bul sózdiń artynda aıtqan adamǵa da, aıtylǵan adamǵa da salmaǵy men jaýapkershiligi, suraýy bar ekenin jaqsy sezingen.
Biz úshin eldiń birligi men jerdiń tutastyǵy – Amanat! San ǵasyr ańsap jetken táýelsizdigimiz – Amanat! Tilimizdi, dinimizdi, dástúr-saltymyzdy buzbaı taza ustaý – Amanat! Jas urpaqqa durys tárbıe berý, Otanyn, ultyn súıýge baýlý – Amanat!
Jer taǵdyry – elge amanat, el taǵdyry – kósh bastaǵan erlerge Amanat! Al aq jaýlyqty ananyń, aq saqaldy ákeniń, aq peıildi balanyń amanaty qashanda bıliktiń moınynda. Amanat qııanat jasamaý – saıası uıymnyń eń basty paryzy. Endeshe, halyq amanatyna adal bolý – Amanat partııasynyń eń negizgi ustanymy bolýy shart.
Prezıdent aıtqandaı, Amanat saıası qurylymy el múddesin qorǵaıtyn naǵyz halyqshyl partııa bolýy kerek. Partııa hatshysy Ashat Oralulynyń baıandamasynda kórsetilgen saıası qurylymdy modernızasııalaý baǵdarlamasy bolashaqta oń nátıjelerge qol jetkizgenin tileımiz.
Partııa ıgilikti jeńister men jetistikterge, senimge ıe bolý úshin jalǵan pafos pen maqtanshaqtyqtan, qurǵaq ýádeden aýlaq bolýǵa tıis. Amanat partııasy – ádilettilik pen shynaıylyqtyń shyraqshysy bolsyn. Bılik aldynda talapshyl, halyq aldynda qamqorshy kelbetimen qýantsyn.
Jańa Qazaqstannyń kemeldenýi jolynda naqty nátıjelerge qol jetkizsin. Tartysqa toly saıasat alańynda el amanatyna adal bolsyn!
Amanjol ÁLTAI,
aıtysker aqyn