Qańtar oqıǵasynan keıin Qazaqstan halqy bılik tarapynan eleýli ózgerister kútti. Sondyqtan eń kóp talqyǵa túsken máseleniń biri Nur Otan partııasynyń bolashaǵyna qatysty boldy. Partııanyń kezekten tys sezinde Prezıdent Qasym-Jomart Toqaev saıası reformalar júrgizilý qajettigine basa nazar aýdara otyryp, partııanyń qataryna belsendi tulǵalardy tartý kerek ekenin basa aıtty.
Iаǵnı saıası partııanyń qataryna burynǵy partııalyq nomenklatýrany emes, qoǵamnyń belgili bir áleýmettik toptary men taptarynyń múddelerin bildiretin eń belsendi ókilderin tartý arqyly onyń erikti saıası uıym retindegi mańyzyn kóterý týraly oılar aıtyldy. Bul – halyqtyń senimin qalyptastyrýǵa baǵyttalǵan mańyzdy mindetterdiń biri. Osylaısha, taıaý bolashaqta adamdardyń saıası partııalarǵa derbes jáne erkin birigýi, qoǵamdaǵy ózekti máselelerdi sheshýge belsendi aralasýy júzege asatyny kúmán keltirmeıdi.
Partııanyń qataryna proporsıonaldy túrde barlyq aımaqtyń ókilderi kiretin boldy. Bul bastama óńirlerdiń ózekti máselelerin sheshýge basty nazar aýdarylatynyn kórsetedi. Sonymen qatar azamattyq sektordan kiretin ókilder sanynyń artýy – qýantarlyq jaǵdaı. О́ıtkeni naryq jaǵdaıynda bul sektor áleýmettik áljýaz toptardyń múddesin qorǵaýǵa, memlekettiń ınklıýzıvtik saıasatyn jetildirýge úles qosatyny aıtpasa da túsinikti.
ÚEU men BAQ ókilderiniń, bilim salasynyń mamandarynyń kóbeıtilýi de partııa sheshetin máselelerdiń kúrdeliligin, halyqqa ashyq bolatynyn sıpattaıdy. Partııa qataryna kiretin memlekettik qyzmetkerler sanynyń úshten birine deıin qysqartylýy onyń saıası partııa retinde memlekettik organdarmen birigip ketpeıtin derbes saıası uıym retinde qalyptasýyna, tek bıliktiń múddesin jaqtaıtyn partııaǵa aınalyp ketpeýine múmkindik beredi dep kútemiz.
Belgili nemis áleýmettanýshysy Maks Veber «Saıasat qyzyǵýshylyq jáne kásip retinde» degen eńbeginde «Adamdar saıasatqa aqsha úshin keledi, sodan keıin olar saıasat arqyly kún kóredi nemese olarǵa áleýmettik bedel kerek, mundaı jaǵdaıda olar saıasat úshin jumys isteıdi» dep saıasatqa keletin adamdardyń maqsattaryn anyq beıneledi. Saıasatqa aralasýdy kásip retinde qarastyrmaıtyn, saıasatty durys túsine biletin, qoǵamnyń damýyna shyn úles qosatyn mamandardy qoldaý – durys sheshim. Sondyqtan osy máselege qatysty oılar el Prezıdentiniń Nur Otan partııasynyń kezekten tys sezinde sóılegen sózinde erekshe baıqaldy.
2022 jyldyń 1 naýryz kúni partııa ataýyn Amanat dep ózgertýge qatysty aıtylǵan usynysty durys sheshim dep esepteımiz. Bul ataý jańa Qazaqstandy jańa ózgeristerge bastaıtyn, táýelsizdigimizdi qorǵaýǵa baǵyttalǵan, qoǵamdy biriktiretin ózekti ıdeıa bolatynyna senimimiz mol.
Gúlnapıs ÁBDIKEROVA,
Ál-Farabı atyndaǵy Qazaq ulttyq ýnıversıteti
Áleýmettaný jáne áleýmettik jumys kafedrasynyń professory, áleýmettaný ǵylymdarynyń doktory