Prezıdent Q.Toqaevtyń tóraǵalyǵymen onlaın formatta ótken Nur Otan partııasynyń kezekten tys XXII seziniń kún tártibinde partııanyń Saıası keńesiniń quramyna ózgerister engizý jáne Nur Otan partııasyn jańǵyrtý máseleleri qaraldy.
Sezde Memleket basshysy Nur Otan partııasynyń ataýyn Amanat dep ózgertýdi qoldady. «Bul elimiz úshin de, ultymyz úshin de aıryqsha máni bar kıeli uǵym. Egemendigimiz, eldigimiz ben birligimiz, keń-baıtaq jerimiz bizge babalardan jetken amanat. Osy qasterli qundylyqtarymyzdy kózdiń qarashyǵyndaı saqtap, bolashaqqa mıras etýimiz kerek. Memlekettilik, dástúr jalǵastyǵy, urpaq sabaqtastyǵy degenimiz – mine osy. Halqymyz eshqashan amanatqa qııanat jasamaǵan. Partııa bul qaǵıdatty berik ustanady», dedi Qasym-Jomart Toqaev.
El Prezıdenti: «Amanat – ortaq maǵynadaǵy sentrıstik partııa. Ol – ádildik partııasy, halyq birligi partııasy, alǵa qaraı nyq qadam basý partııasy, halyqtyń pikiri men armanyn tyńdaıtyn jáne azamattarymyzdyń múddesi úshin áreket etetin partııa», dep, partııany jańǵyrtýǵa arnalǵan birqatar basymdyqty atap kórsetti. Olar: partııa apparatynyń tıimdiligin arttyrý, Májilis pen Máslıhattardaǵy fraksııa qyzmetin jandandyrý, azamattardyń múddeleri men partııanyń ashyqtyǵyn arttyrý, partııaishilik saılaýdy ótkizý quraldarynyń aıasyn keńeıtý jáne ákimder saılaýyna belsendi qatysý, saıası kadrlardy daıarlaý. Prezıdent bul aıtylǵandardy barynsha qysqa ýaqytta júzege asyryp, «damýdyń jańa kezeńinde partııaǵa jańa tuǵyrnama qajet. Biraq negizgi qundylyqtarymyz ózgermeýge tıis», deı otyryp, Ortalyq apparatqa jumys tobyn quryp, partııanyń jańa tuǵyrnamasyn ázirleýdi tapsyrdy.
Sezde partııany jańǵyrtý boıynsha júrgiziletin jumystardyń 7 baǵyty aıqyndaldy. Onyń birinshisi – halyqpen keri baılanys jasaý quraldarynyń tıimdiligin arttyrý. Bul rette partııanyń ortalyq apparaty men fılıaldary janyndaǵy qoǵamdyq keńesterdiń sany ońtaılandyrylyp, quramy jańartylady, qoǵamdyq qabyldaý bólmeleriniń jumysy proaktıvti formatqa aýystyrylady. Búgingi kúni qoǵamdyq qabyldaý bólmeleri halyqpen aralasyp, olardyń suranystaryn oryndaýǵa baǵyttalǵan tıimdi tásilderdiń biri bolyp otyr.
Ekinshi baǵyt – partııalastar arasynda yntymaqtastyqty arttyrý. Bul rette bastaýysh partııa uıymdarymen (BPU) jumys kúsheıtiledi. BPU-lardy irilendirý, olardyń tóraǵalaryn baǵalaý júıesi men reıtıng engiziledi. Sonymen qatar jergilikti jerdegi máselelerdi sheship, partııalyq jobalardy júzege asyrý úshin partııa jarnalarynyń 20%-y BPU-ǵa qaıtarylady. Partııalastarǵa halyqpen jumys jasaý daǵdylary úıretiledi. Bul rette partııa Tóraǵasy Saıası menedjment akademııasynyń jumysyn aıtarlyqtaı kúsheıtý týraly tapsyrma berdi. Bastaýysh partııa uıymdary partııalastardyń uıymshyldyǵyn arttyrý quralyna aınalady.
Úshinshisi – partııanyń jumysynda ashyqtyqty arttyrý. Bul úshin barlyq deńgeıdegi máslıhattarda depýtattar qyzmetiniń reıtıng qorytyndylary jarııalanatyn bolady. 2021 jyly partııa depýtattarynyń reıtıngi qanatqaqty joba retinde júrgizile bastaǵan bolatyn. Sezde partııanyń atqarýshy hatshysy Ashat Oralov jobanyń synaqtan ótkenin, endi nátıjesi jarııalanatynyn aıtty. Sonymen qatar ashyqtyqty arttyrý úshin parııanyń mobıldi qosymshasy iske qosylady, TALQYLAU pikirtalas alańqaıy, partııanyń baspasóz ortalyǵy qurylady.
Tórtinshi baǵyt retinde partııalyq baqylaýdy kúsheıtýge mán beriledi. Bul rette Ortalyq apparat Májilistegi partııa fraksııasymen jáne Úkimetpen birlesip, Saılaýaldy baǵdarlamanyń oryndalýyn tekseredi jáne Parlament Májilisindegi fraksııa otyrysynda Premer-Mınıstrdiń qatysýymen Úkimettiń esebin tyńdaıdy. Al máslıhattardaǵy fraksııa otyrystarynda aımaqtyq fılıal tóraǵalarynyń – ákimderdiń esepteri tyńdalady. Bul partııanyń elektorat aldyndaǵy ýádelerin oryndaý talabyn odan ári kúsheıtedi.
Besinshi baǵyt boıynsha partııanyń baǵdarlamalyq qujattary qaıta qaralatyn bolady. Bul rette partııanyń Jarǵysyna ózgerister engiziledi, 2030 jylǵa deıingi «Baqýatty qoǵam: onjyldyqtyń 10 maqsaty» baǵdarlamasy jańartylady, 2025 jylǵa deıingi «Sybaılas jemqorlyqqa qarsy is-qımyl baǵdarlamasy» qaıta qaralady. Osynyń negizinde partııa Tóraǵasynyń tapsyrmasyna oraı negizgi qundylyqtarymyzdy ózgertpeı, partııanyń jańa tuǵyrnamasy ázirlenetin bolady.
Altynshy baǵyt halyqtyń ár túrli toptarymen jumys isteýge arnalady. Osy ýaqytqa deıin «Ardagerlerdi ardaqtaıyq», «Baqytty otbasy», «Kedergisiz keleshek», «Ulttyq mura», «Jastar – Otanǵa», «Halyqqa kómek» syndy 6 partııalyq joba júzege asyrylyp keledi. Aldaǵy ýaqytta TAZALIKE, «Áleýmet», «Jańa Qazaqstanǵa arnalǵan 30 ınnovasııalyq ıdeıa» atty jańa jobalar iske qosylatyn bolady. Atalmysh jobalar qoǵamdyq kóńil kúıdi saralaý men áleýmettik shıelenistiń yqtımal oshaqtaryn anyqtaýǵa, sarapshylar men belsendi azamattardyń usynystaryn jınaqtaýǵa baǵyttalady.
Sońǵy jumys baǵyty Jas Otan jastar qanatynyń jumysyn jetildirýge arnalady. Buǵan deıin saılaý kezinde áıelder men jastarǵa arnalǵan kvota engizilgeni belgili, sonyń nátıjesinde, 2021 jyly saılanǵan depýtattardyń arasynda jastardyń úlesi artty. Memleket basshysynyń Jas Otan qataryna paıdaly qoǵamdyq qyzmetpen aınalysýǵa daıyn, jastar arasynda senimge ıe kóshbasshylardy tartý qajet degen tapsyrmasyna oraı bedeldi jas kóshbasshylardy uıym qataryna shaqyrý jumysy júrgiziledi. Sonymen qatar jas depýtattar korpýsynyń qyzmetin jandandyrý, Biz birgemiz jáne «Volonter mektebi» volonterlik uıymdaryn keńeıtý, aýyl jastarynyń áleýetin damytýǵa baǵyttalǵan jańa «О́rleý» jobasyn iske qosý, jastardy otansúıgishtikke baýlıtyn «Qaısar» áskerı-patrıottyq jobasyn júzege asyrý jumystary men kreatıvti jas partııa músheleriniń áleýetin iske asyrýǵa múmkindik beretin «Partııanyń kontent-fabrıkasy» jobasy qolǵa alynady. Partııa qyzmetinde jastardyń, sonyń ishinde NEET sanatyndaǵy jastardyń problemalyq máselelerin, olardy áleýmettendirý ádis-tásilderin anyqtaý boıynsha keshendi jumystar júrgizilip jatyr.
Sezde sóılegen sózinde Memleket basshysy Q.Toqaev el birligin nyǵaıtyp, Jańa Qazaqstandy qurý bárimizge ortaq mindet ekenin aıtty. Osynaý asqaraly mindetti júzege asyrý úshin el bolashaǵy jastardyń áleýetin arttyrý – ýaqyt talaby. Partııanyń baǵyt-baǵdary aıqyndaldy, endi jańǵyrtý jolyndaǵy basymdyqtardyń oryndalýyna jaýapkershilikpen aıanbaı eńbek etýimiz kerek!
Mıra BALTYMOVA,
Aqtóbe qalalyq máslıhatynyń depýtaty