Halyq qańtardyń qasiretin umyta qoıǵan joq. Partııa quryltaıynda kóterilgen kóptegen másele men qańtar oqıǵasyna túrtki bolǵan áleýmettik shıelenistiń tamyry ishki saıasattaǵy ári qoǵam men bılik arasyndaǵy qarym-qatynastaǵy daǵdarysta jatqany anyq.
Partııanyń kezekten tys seziniń basty jańalyǵy uıym ataýynyń Amanat dep ózgertilýi boldy. Kópshilik muny jyly qabyldady.
Prezıdent saıası reformalardy jarııalaýdy 16 naýryzǵa josparlap, partııanyń ishki qurylymdaryna jańa saıası modelge ótýge eki apta ýaqyt bergeni belgili. Qalypty saıası júıeni jańartý bir kúndik ıakı bir aılyq másele emes, birizdilikpen tabandy túrde júzege asyrýdy talap etedi.
Sonymen qosa partııanyń jańa ataýy Amanat qoǵamda pikirtalas týdyrǵany ras. Degenmen maqsat partııanyń ataýyn ǵana ózgertý emes, qurylymyn, jumys stılin, halyqpen baılanysyn qaıta qaraý jańǵyrtý asa mańyzdy.
Bul qadamdy aldaǵy saıası ózgeristerdiń alǵashqy jarshysy retinde qabyldaǵan abzal. Sol sebepti bul sezdi tolyqqandy saıası oqıǵa dep baǵalaýǵa áli erte bolar. Jaqynda Prezıdenttiń saıası reformalar jónindegi jospary jarııalanady. Sol kezde elimizdiń saıası arenasyndaǵy sońǵy ózgeristerdiń logıkalyq tizbesin qarap, belgili bir pikir qalyptastyrýǵa bolady. Dese de jastar bul sheshimderdiń elimizde úlken saıası ózgeristerge jol ashqanyn kórgisi keledi.
Ýálıhan BAHRETDINOV,
«Ulan-ǵaıyr dala eli» qoǵamdyq birlestiginiń jetekshisi