Almaty qalasyn damytý jóninde ótken keńeste Memleket basshysy qalanyń krımınogendik jaǵdaıy men jol-kólik oqıǵalaryna tanymal adamdardyń balalary men týystarynyń jıi qatysy bolatyny týraly derekterdiń de az emes ekenin ataǵan edi. Búgin 28 naýryz kúni osy máselelerdi qaperge alǵan Bas prokýrordyń orynbasary Nurmahanbet Isaev Prezıdent janyndaǵy Ortalyq kommýnıkasııalar qyzmetinde ótken brıfıngte tolǵaǵy jetken jaıttarǵa baılanysty óz oıymen bólisti. Bul týraly Egemen.kz tilshsi habarlady.
Kólikke mas kúıinde otyrǵan júrgizýshi sol sátten bastap qasaqana qylmys jasaýshy bolyp tabylady, dedi ol. Abaısyzda bolatyn jol-kólik oqıǵalary az emes. Mundaı kezdegi apatty araq iship alyp, kólik júrgizýge otyrǵan adamnyń týdyrǵan jol apatymen esh salystyrýǵa kelmeıdi. Demek, spırtti ishimdik iship rólge otyrǵan adam aldyn ala qylmys jasaýshy bolyp tabylady. Qazirgi kezde jańa Qylmystyq kodeks jobasynda bul másele qaralyp jatqany belgili. Elbasynyń tapsyrmasyna oraı, Qylmystyq kodekske tıisti ózgeristerdi engizdik, jaqyn arada bul ózgeristerdiń de qabyldanary anyq. Bul ózgeris qabyldanǵannan keıin aýyr qylmys jasaǵan adamdar tıisti jazadan qutyla almaıtyn bolady», dedi quzyrly organ ókili.
Prezıdenttiń tapsyrmalaryn is júzine asyrý maqsatynda Bas prokýratýra qylmystyq qýdalaý organdary men prokýrorlar ózderiniń jumysynda barshany jalyqtyrǵan paıyzdar men sıfrlardy emes, birinshi kezekte adamdardyń quqyqtary men múddelerin qorǵaýdy basty mindetteri dep esepteýine qol jetkizýge kirisipti. Sondyqtan olar qylmystyq ahýaldyń jaǵdaıyn burynǵydaı ótirik emes, shynaıy túrde ekenin aıta alatyn jaǵdaıǵa jetipti. «Degenmen bizder zań buzýshylyqtar birli-jarym ǵana dep oılamaımyz. Bizdiń maqsat –zańsyzdyqtardy múldem boldyrmaý»,- deıdi N. Isaev.
Aleksandr Tasbolatov.
Derekkóz: Egemen.kz.
Foto: Bas prokýratýranyń baspasóz qyzmeti.