Memleket basshysy Qasym-Jomart Toqaevtyń osy jolǵy Joldaýy – menińshe, is júzindegi Jańa Qazaqstannyń bastalýy. Shyny kerek, bul Joldaýdy qazaqstandyqtar asyǵa kútti. Sebebi qańtar oqıǵasynan keıin kóp jańa bastama aıtyp, kóp ózgeristiń shetin shyǵardy. Biraq onyń qalaı júzege asatyny, qandaı formada bolatyny belgisizdeý edi. Sondyqtan Jańa Qazaqstan osy turǵydan bastalady.
Joldaýdyń negizgi saıası bóligi dál osy qańtar oqıǵasynan túıgen sheshimder men jańa saıası qurylymnyń sulbasyn kórsetetin mańyzdy jańalyqtardan turdy. Sonyń ishinde ótken qaıǵyly oqıǵalardyń eń úlken sabaǵy – qazaqstandyq qoǵam men bılik arasyndaǵy dánekerlikti, bıliktiń qoǵamdy estý múmkindigin kúsheıtý, odan keıin bıliktiń bir qolda shoǵyrlanýyn shekteý baǵytyndaǵy ózgerister. Osy turǵydan kelgende keshe Prezıdent Qazaqstandaǵy sýperprezıdenttik basqarý júıesiniń osymen aıaqtalǵanyn aıtty. Bul – biz úshin óte úlken ózgeris, jańa beles. Budan bylaı Memleket basshysynyń jaqyn týystary, otbasy músheleri eshqandaı memlekettik jáne memleketke jaqyn kvazımemlekettik sektordaǵy kompanııalarda joǵary laýazymǵa taǵaıyndalmaıdy. Kelesi ózgeris – Prezıdenttiń qandaı da bir partııaǵa múshe jáne basshy bolmaıtyny. Bul da – saıası júıemizdi alǵa súıreıtin ózgeris. Odan keıin Prezıdent oblys ákimderin bir ǵana emes, kemi eki úmitkerdi oblystyq máslıhatqa usynyp, máslıhat músheleriniń qoldaýymen, múmkin máslıhattyń saılaýymen taǵaıyndaıdy.
Negizgi sheshimder men usynystardyń bir bóligi barlyq deńgeıdegi uıymdastyrý máseleleri men olardyń tıimdiligin artyrýǵa baǵyttaldy. Ashyǵyn aıtqanda, uıymdastyrýshylyq jaǵynyń zamanǵa saı bolmaýynan memlekettik basqarý júıesindegi sheshimderdiń oryndalýy aqsap jatqanyn kórip júrmiz. Endi ulttyq jobalardy, túrli strategııalyq qujatty talqylaýǵa úkimettik emes uıymdar men aqparattyq quraldar keńinen aralasa alatyn boldy.
Sonymen qatar buqaralyq aqparat quraldary týraly jańa zań qabyldanady jáne bul zańnyń negizgi maqsaty jýrnalısterdiń áldebir saıası, ekonomıkalyq tartystyń nemese oıynnyń quraly bolyp ketpeýin jáne syrttan keletin tapsyrystardy oryndaıtyn qolshoqparǵa aınalmaýyn kózdeıdi. Sózsiz, mańyzdy ári qajetti dúnıe. Biraq munyń qalaı iske asatynyn muqııat oılanǵan jón.
Ulttyq senim keńesiniń jańa evolıýsııalyq kezeńi týyp jatyr. Ulttyq keńes Ulttyq quryltaıǵa aınalmaqshy. Bul Quryltaıǵa óńirlerdegi ókilder kóbirek tartylady. Atalǵan keńestiń múshesi retinde Ulttyq keńes bılik pen qoǵam, halyq arasyndaǵy dánekerlik mindetin atqara aldy dep aıta alamyn. Halyqtyń talap-tilekteri keńes músheleriniń usynystary arqyly tikeleı Prezıdentke jetip jatty. Keńestegi kóp usynys osy Joldaýdan da kórinis taýyp jatyr. Mine, endi keńestiń «keregesi» keńeıip, Quryltaıǵa aınalmaq. Bul – bılik pen halyq arasyndaǵy kópirdi odan ári nyǵaıta túsetin tetik.
Qoryta aıtqanda, osynyń barlyǵy – Qazaqstannyń erteńgi kúnine senim uıalatatyn mańyzdy sheshimder. Bir qýantatyny, álemde qalyptasyp jatqan geosaıası jaǵdaıǵa, Reseı men Ýkraına arasyndaǵy bizge jaqyn mańda bolyp jatqan ǵalamdyq kıkiljińge qaramastan, Qazaqstan óziniń aldyna qoıǵan negizgi maqsattardan, belgilengen strategııalyq mejelerinen aınymaı, sol jolmen kele jatyr. Muny quptarlyq iske balaımyn. Ulttyq qoǵamdyq senim keńesiniń múshesi, Qazaqstannyń azamaty retinde Prezıdenttiń osy jarııalaǵan Joldaýyndaǵy bastamalaryna ún qosýǵa da, ispen aralasýǵa da daıyn ekenimdi jetkizgim keledi. Jáne halyqty da Memleket basshysynyń bastamalaryn ispen qoldaýǵa shaqyramyn.
Raýan KENJEHANULY,
«Ulttyq aýdarma bıýrosy» qoǵamdyq qorynyń dırektory,
Ulttyq qoǵamdyq senim keńesiniń múshesi