Memleket basshysy Qasym-Jomart Kemeluly Toqaev bıylǵy Qazaqstan halqyna Joldaýynda táýelsizdigimizdiń uly bolashaǵynyń, Jańa Qazaqstannyń jarqyn beınesin aıqyndaıtyn keleli máselelerdi el nazaryna usyndy.
Muny ótkenimizdiń sabaǵyn saralaǵan, damýdyń jańa belesine ótýdiń jolyn kórsetken tarıhı Joldaý deýimiz qajet. Prezıdent el damýynyń halyq kóńilinen shyǵatyn baǵyt-baǵdaryn qadaý-qadaý sharalardy atap, ony saıası turǵydan senimdi túrde naqtylap berdi. Qoǵamdy basqarýdyń demokratııalyq jańashyl úrdisine batyl qadam basýdy jedel júzege asyrýdyń mańyzdylyǵyna den qoıdy. Joǵary ókildik bılikke, saılaý júıesine halyq seniminen shyǵyp, bedelin arttyratyn mindetterdi júktedi. El Prezıdentiniń joǵary bılikti saıası jaǵynan reformalaýdyń qajettigi pisip jetilgendigi jónindegi paıymy halyq qoldaýyn tabatyny sózsiz. Avtorıtarlyq júıeniń qoǵamdy rýhanı, áleýmettik jáne ekonomıkalyq jaǵynan toqyratqan keleńsizdikteriniń saldarynan túbegeıli arylmaıynsha, Qazaq eliniń syndarly bolashaǵy bolmaıtynyn Memleket basshysy óziniń Joldaýynda bultaryssyz aıtty. Bul – halyq sanasyn oıatatyn, jigerlendiretin sóz.
Eldiń jan-jaqty damýynyń negizi tutqasy bıliktiń qana emes, árkimniń óz isindegi, ar-ujdany aldyndaǵy bıik jaýapkershiliginde degen oı osy Joldaýdyń ózeginde utymdy órildi. Memleketti basqarýda qazaq qoǵamynyń alatyn róli aıryqsha aıtyldy. Buǵan Prezıdenttiń qoǵamdyq oı-sananyń áleýetin Ulttyq quryltaı qurý máselesin alǵa tartýy dálel.
Qazaq eliniń ákimshilik-aýmaqtyq qurylymyn jetildirýge qatysty Joldaýda aıtylǵan Memleket basshysynyń usynystary búgingi kúnniń talabyna saı ádilettiliktiń saltanat qurǵany deýimiz kerek! Atap aıtqanda, Alash rýhyn alǵash jarııa etken, halyqtyń ádebıeti men mádenıetiniń qasıetti bas ordasy Semeı jerin Abaı oblysy, el tarıhynyń altyn besigi, burynǵy Jezqazǵan óńirin Ulytaý oblysy, baıtaq qoınaýyn aıtýly jeti ózen órnektegen óńirden Jetisý oblysynyń boı kóteretini – tarıhı jańalyq ekeni daýsyz! Halyqtan usynys bolsa, Almaty oblysynyń ortalyǵy bolatyn Qapshaǵaı qalasynyń Qonaev atymen atalýy da ábden múmkin ekendigin de Qasym-Jomart Kemeluly búkpesiz aıtty. Elimizdiń asa kúrdeli kezeńde, geosaıası qıyndyqtar antalaǵan mezgilde damý turaqtylyǵyn, birlikti saqtaý jolyndaǵy tegeýrindi ustanymy da Joldaý mazmunynda aıtylǵan aqıqat. Prezıdent Táýelsizdik maǵan bárinen de qymbat degen sózin búgin de qaıtalap aıtty! Táýelsizdikti bekemdeı túsý jolyndaǵy jańa baǵytymyzdan adaspaıyq, el tiregi halqymyzdyń bolashaǵy irgeli isterimizden, izgilikti oılarymyzdan kórinis tapsyn degim keledi.
Mádı AIYMBETOV,
jazýshy, Halyqaralyq «Alash» syılyǵynyń laýreaty