Árıne, Prezıdenttiń Joldaýyn naqty jáne egjeı-tegjeıli túsinýge tıispiz. Alaıda qazirdiń ózinde aldyn ala qorytyndy jasaýǵa bolady. Joldaýǵa qatysty barlyq tarmaqtaryn aıtpaı, meniń oıymsha eń mańyzdylaryna toqtalyp óteıin.
Aldymen aıta ketý kerek, Memleket basshysynyń birqatar bastamasy kópshilik halyqtyń jáne oppozısııa ókilderiniń kóńilinen shyqty. Bul saıası partııalar men saılaý týraly zańdar týraly aıtqanda. Endigi kezekte saıasat alańynda óz kózqarastarymen jańa partııalar paıda bolatyny anyq. Alaıda bul Amanat partııasynyń bedeli men partııalastar sany azaıady degen sóz emes. Bul bizdiń partııamyzdyń óz jumysyna jańadan kózqaraspen, halyqpen odan da tyǵys jumys isteýge yntalandyratyny anyq. Qańtar oqıǵasy bizge qazirgi ýaqytta odan ári saıası reformalardy jyldam qarqynmen júrgizilýi kerektigin kórsetti. Prezıdenttiń, Esep komıteti men Konstıtýsııalyq keńestiń tóraǵalary men múshelerin partııa múshesi bolmaýy týraly sheshim elimizdegi barlyq partııalarǵa teń múmkindik berip, olarǵa birdeı jaǵdaı jasalatynynyń birden-bir belgisi. Endigi kezekte oblys, qala, aýdan, aýyl ákimderi men orynbasarlary jergilikti partııa tóraǵasy bola almaıdy. Bul usynysqa partııa músheleri de kelisetini sózsiz. Sebebi jergilikti máslıhattaǵy fraksııalardyń jumysy jandanyp, ákimder partııany ákimshiliktiń bir bólimi dep sanaýdy qoıyp, partııalarmen sanasatyn bolady. Prezıdent aıtqandaı, endi partııa men memlekettik organdardyń jumystaryn bólip, ajyratyp alýymyz kerek. Bul – sol bastamalardyń biri.
Joldaýda bir jaǵynan halyq qalaǵan sátter boldy, al ekinshi jaǵynan tosynsyı bolatyn ózgerister aıtyldy.Ol birden úsh oblys – Ulytaý, Abaı jáne Jetisýdy qurý (nemese qaıta qurý) týraly bolyp otyr.
Jezqazǵan aımaǵyna basa nazar aýdara otyryp, keıbir oblystardyń óńir ortalyǵynan alys ornalasýy kóptegen áleýmettik, ekonomıkalyq máselerdi der kezinde sheshilýine tosqaýyl bolyp jatqany málim. Tipti halyqqa da oblys ortalyǵyna baryp-qaıtý kóp ýaqyt pen qarjy alatyny bar. Meniń oıymsha, bul durys sheshim. Árıne, elorda nemese Almaty qalasynyń turǵyndary úshin bul – mańyzdy emes, tipti bıýdjetten artyq aqsha jumsaý sııaqty kórinýi múmkin, biraq halyqtyń muqtajdyqtaryn eskerý qajet. Jezqazǵan men Semeı turǵyndarynyń arasynda bul bastamany qoldaıtyndar az emes. Qalaı bolǵanda da, bul aımaqtardy áleýmettik-ekonomıkalyq damýdyń jańa deńgeıine kóterýge múmkindik beredi. Sonymen qatar ıdeologııalyq aspekt pen ulttyq tarıh týraly umytýǵa bolmaıdy. Ulytaý – geografııalyq jaǵynan ǵana emes, rýhanı jaǵynan da Qazaqstannyń júregi. Jetisýǵa keletin bolsaq, basty aspekt – Qasym-Jomart Kemelulynyń onyń ákimshilik ortalyǵyna Dinmuhamed Qonaev atyn berýge tikeleı usynys jasaýy. Osynyń barlyǵy qazaq biregeıliginiń damýyna oń áser etedi. Memleket basshysy sóziniń sońynda óziniń basty mindeti eldiń táýelsizdigi men aýmaqtyq tutastyǵyn saqtaý dep atap ótti.
Ǵanı TAShQARAEV,
Parlament Májilisiniń depýtaty