Memleket basshysynyń Qazaqstan halqyna Joldaýy Jańa Qazaqstandy qurýdyń jarqyn úlgisin aıqyndap berdi. Qýantarlyǵy, ár usynys halyqtyń ótinish-tileginen týyndaǵany baıqalady.
«Halyq únine qulaq asatyn memleket» tujyrymdamasynyń kózdegeni de sol emes pe?! Ásirese aýyldaǵy aǵaıynnyń máselesi bıik minberde kóterilgeni qajet-aq. Bul rette, el Prezıdenti aýyldardy jańǵyrtý jumystary qaldyq qarajatpen atqarylatynyn alǵa tartyp, eldi mekenderdi kórkeıtýdi myqtap qolǵa alý kerek ekenin aıtty.
Mańyzdy mindet eń áýeli jańa saılaý júıesi arqyly iriktelgen aýyl ákimderine júkteletini sózsiz. Shyny kerek, qazir burynǵydaı aýdan bıýdjetine alaqan jaıyp otyratyn kez emes. Tórtinshi deńgeıli bıýdjettiń qarjysyn durys ıgerip, ýáde etilgen sharýany sapaly tyndyrýǵa múmkindik bar. Buǵan deıin aýyldy jandandyrýǵa baǵyttalǵan jobalar tasada qalyp qoıatyn. Sebebi «jaryq, jol máselesin sheshý kerek edi», dep tek aýyzsha ǵana aıtylyp júrdi. Qazir aýyldyq bıýdjet esebinen jobalardyń tıisti qujattaryn ázirleýge jol ashyldy. Sáıkesinshe, aýdandyq bıýdjetten qarjylandyrý múmkindigi zor. Qysqasy, aýyl ákimi isker bolsa, bıýdjet molaıyp, sáıkesinshe úlken sharýa tyndyrylatyny anyq.
Ákim saılaýy demekshi, Memleket basshysy óz Joldaýynda proporsıonaldy-majorıtarly saılaý júıesine kóshýdi usyndy. Jańashyldyq barlyq azamattyń quqyǵyn eskerýge múmkindik bermek. Áıtpese, sońǵy ýaqytta turǵyndar saılaýǵa atústi qarap, qoǵamda «meniń daýysym ne shesher deısiń» degen túsinik qalyptasqany belgili. Muny el Prezıdenti de atap ótti. Saılaý júıesin jańǵyrtý arqyly azamattardyń belsendiligin arttyryp, bılikke degen senimdi bekitýge jol ashylatyny sózsiz.
Sanıra JÚSIPOVA,
Amanat partııasy Pavlodar oblystyq fılıaly janyndaǵy
Jas Otan jastar qanatynyń tóraǵasy