Qashan da bolashaqqa úmitpen qaraıtyn dana halqymyz Prezıdenttiń Joldaýyn jyly qabyldady. Qasym-Jomart Toqaev sońǵy ýaqytta elimizde oryn alǵan eń ózekti máselelerge taldaý arqyly ózgerister jasaýdyń kezeńi kelgendigin alǵa tarta otyryp, Qazaqstan halqyna saıası jańǵyrtýdyń keshendi baǵdarlamasyn usyndy.
Elimizdegi saıası reformanyń ózektiligin ǵalamda jáne elimizde oryn alǵan sońǵy ýaqıǵalarmen sabaqtastyra kele «saıası jańǵyrý bolmasa, elimizdi ornyqty damytý, aýqymdy áleýmettik-ekonomıkalyq ózgeris jasaý múmkin emes» ekendigin qadap aıtty. Q.Toqaevtyń Joldaýda usynǵan 10 bastama uzaq jyldar boıy qordalanǵan eldegi saıası, ákimshilik jáne áleýmettik máselelerdi sheshýdiń kilti bolmaq. Mysaly, eldi kúshti Parlamenti bar prezıdenttik respýblıkaǵa aınaldyrý, ádil saılaý júıesin qurý, saıası partııalardyń jumysyn jaqsartý, Konstıtýsııalyq sot qurý, Ulttyq quryltaı qurý, ákimshilik-aýmaqtyq qurylymdy jaqsartý, daǵdarysqa qarsy sharalardy júrgizý sııaqty aýqymdy josparlary eldiń kóńilin kúpti etken jáne kókeıinde júrgen kóptegen máseleniń ońdy sheshilýine septigin tıgizeri anyq. Prezıdentimiz kótergen bastamalar halyq pen bılikti bir arnaǵa toǵystyratyn jáne eldi jarqyn bolashaqqa, ıaǵnı Jańa Qazaqstanǵa alyp baratyn baspaldaq ispettes.
Ásirese, Prezıdenttiń «Azamattyq qoǵam ınstıtýttarynyń rólin nyǵaıtý» bastamasy qoǵamdaǵy shıelenisken máselelerdi sheshýdiń utymdy tásili ekendigine kúmán joq. Bul bastama – ult ıgiligi úshin qyzmet etetin kóptegen qoǵamdyq uıym men keńestiń qurylýyna septigin tıgizip, Úkimet pen qoǵam arasyn jalǵaýshy altyn kópirge aınalady dep oılaımyn. О́ıtkeni qoǵamdyq uıymdar men keńesterdiń belsendi jumys isteýi azamattyq qoǵamnyń jáne qoǵamdyq ınstıtýttardyń damýyna serpin beredi.
Abaı atyndaǵy QazUPÝ-diń Jas zertteýshiler keńesi Prezıdenttiń Joldaýda kótergen bastamalaryn jastar arasynda nasıhattaý jáne jastardyń saýattylyǵyn kóterý maqsatynda «Jańa kezeńdegi Jańa Qazaqstan jastary» atty jastardyń saýattylyq aptalyǵyn ótkizýdi josparlap otyr. Aptalyq aıasynda jastarymyzdyń dinı, saıası, quqyqtyq, medıa jáne aqparattyq, qarjylyq jáne gıgıenalyq saýattylyqtaryn kóterý maqsatynda osy salalardyń ǵalymdarymen, jaýapty organ ókilderimen jáne sarapshylarmen kezdesýler ótkizetin bolamyz.
Babalarymyzdyń «Birlik bar jerde – tirlik bar», «Jumyla kótergen júk jeńil» degen naqyl sózderiniń astarynda tereń mán jatyr emes pe?! Memleket basshysy usynǵan 10 bastamany el bolyp jumylyp júzege asyrǵanda ǵana Jańa Qazaqstandy quratynymyzdy barshamyz túsinýimiz kerek.
Shahıslam LAISHANOV,
Abaı atyndaǵy QazUPÝ,
Jas zertteýshiler keńesiniń tóraǵasy, PhD