Tabıǵat-Ananyń býsanyp, dúnıe ataýly jańarar mezgilde Qazaqstan jańarý dáýirine qadam basyp otyr. Memleket basshysy Qasym-Jomart Kemeluly Toqaevtyń baǵdarymyzdy aıqyndap, baqytymyzdy eseleıtin bul Joldaýy uzaq merzimdi qamtyǵan tarıhı qujat bolǵandyǵyna kózimiz anyq jetti.
Memlekettiń tutastyǵy men ultymyzdyń qundylyqtaryn saqtap qalý úshin myzǵymas birliktiń mańyzdylyǵyna toqtalyp, keshegi qańtar qasiretiniń qaterin oı eleginen ótkize sóz sabaqtaǵan el Prezıdenti óz ustanymyndaǵy tarıhı jaýapkershiliktiń salmaǵyn aıqyn ańǵartty. Ásirese, qańtar oqıǵasyna qatysty tergeý amaldaryna alańdaýshylyq bildirip, bıliktiń tek ádiletke júginetinine kepil bolarlyq oı tolǵaýy súısindirdi. Laýazymdy tulǵalardyń Otanǵa opasyzdyq jasaýyna qynjylys bildirgen Prezıdent barlyq sheshim tek ádilet turǵysynan jasalatynyna sendirdi.
Jańa Qazaqstannyń jarqyn bolashaǵy úshin jasalǵan tarıhı baılamnyń qaı-qaısysy da jańa dáýir, tyń belestiń jarshysyndaı bolǵanyn halyq kórdi, tyńdady. Prezıdent ókilettigin qysqarta otyryp, Parlament yqpalyn arttyrý, sol arqyly eldegi demokratııalyq sergektikti qamtamasyz etý jónindegi bastamalary kimge bolsyn oı salarlyq. Sondaı-aq Prezıdenttiń partııa múshesi bolýyn shekteý, sáıkesinshe ákimder men onyń orynbasarlarynyń partııalyq qyzmetke aralaspaýy sekildi tyń bastamalary partııalyq damýdyń derbestigin qamtamasyz etetin negizgi faktor dep atar edim. Iаǵnı partııalar arasyndaǵy saıası básekelestikti damytý, oǵan joǵary bılik ókili retinde Prezıdenttiń aralaspaýy shyn mánindegi demokratııalyq úrdiske saı keletin sarabdaldyq.
Saıası reformalar naýqanshyldyqqa emes, baıypty baǵdarlamaǵa negizdelýi kerek. Osy turǵydan alǵanda, Qasym-Jomart Kemeluly táýekelge bergisiz tarıhı sheshimder qabyldady. Sonymen qatar Uly dala Ulytaýynyń oblys bolýy, shyraıly shyǵystan Abaı, jer jánnaty Jetisýdan Jetisý oblysynyń qurylýy sol tóńirektegi jergilikti halyqtyń talaı jyldardan bergi arman-tilegi bolatyn. Halyqtyń suranysy, talap-tilegi oryndalǵan memlekette ǵana ádildik saltanat quryp, damýy qarqyndy bolatynyn osy jolǵy Joldaý dáleldedi.
Amanat partııasy Prezıdentimizdiń búgingi Joldaýynda qamtylǵan mindetter men tapsyrmalardy júzege asyryp, shynaıy túrde halyqtyq partııaǵa aınalý maqsatynda aıanbaı qyzmet atqara beretin bolady.
El Prezıdentiniń «Halyqtyń erteń emes, búgin baqytty ómir súrgenin kórgim keledi» degen tujyrymynyń astarynda azamattyq ustanymy da, kóshbasshylyq qasıeti de tur. Sondyqtan birlikti tý etip, Jańa Qazaqstannyń jarqyn bolashaǵy úshin barsha múddelester men el azamattaryn Prezıdent bastamalaryn qoldaýǵa shaqyramyn!
Bekzat ALTYNBEKOV,
Amanat partııasy Qaraǵandy oblystyq fılıalynyń atqarýshy hatshysy, oblystyq máslıhat depýtaty
QARAǴANDY