Memleket basshysynyń «Jańa Qazaqstan: Jańarý men jańǵyrý joly» atty Joldaýyn birneshe márte tyńdadym. О́z oıymdy dostarymmen, áriptesterimmen bólisip, talqyladyq. Bir ǵajaby, báriniń de pikiri oń boldy.
Demokratııa, lıberalızm, ashyq aqparat keńistigi, barlyq qujattardy talqylaý, oblystardyń jandanýy, sony sıpattaǵy Jańa Qazaqstannyń baǵyty quptarlyq. Bul búgingi zamandy ǵana emes, elimizdiń erteńin oılaýdan týǵan umtylys dep eseptesek, qatelespes edik. Bul mindet barshamyzǵa zor jaýapkershilik júkteıdi. El bolashaǵy qashanda jastardyń qanshalyqty bilimdi, tárbıeli bolýyna baılanysty. Biz osy oraıda urpaq ulaǵatyna, tálimi men tárbıesine, bilimi men biligine aıryqsha nazar aýdarýymyz kerek.
Jańa Joldaýdyń mán-mańyzy aıryqsha ekenin jan júregimizben jete sezinip otyrmyz. Ár sózdiń astaryndaǵy tereń mazmundy aqyl tarazysyna salyp zerdeleseńiz, mindet júgi aıqyndala túser edi. Eń aldymen bekem birlikke nazar aýdarý kerek. Sútteı uıyǵan birlik bolsa ǵana bereke úıiriledi. Kúni keshegi qaraly qańtar oqıǵasynda el tutastyǵyna syzat túse jazdaǵan ýaqytta egemendigimizdi saqtap qalǵan qudiret – el Prezıdentiniń janyna toptasqan birlik der edim.
Men Aqmola óńirinde qyzmet etetindikten ólkemizdegi bar jumystyń órge basýyna múddelimin. Jergilikti ózin ózi basqarý júıesin nyǵaıtý, ıaǵnı azamattardy óz aımaǵyn basqarýǵa tartý, qyzyqtyrý, ózekti máselelerdi jyldam sheshý arqyly oblys pen qalanyń qarqyndy damýyna qol jetkizýge bolady dep esepteımin. Sondaı-aq qoǵamdaǵy zorlyq-zombylyqty azaıtý sharalaryn jáne áıelder men balalarǵa qatysty jazany qataıtý qajettigin atap ótpeske bolmaıdy.
Jaılagúl SAǴYNDYQOVA,
Sh.Ýálıhanov atyndaǵy Kókshetaý ýnıversıtetiniń prorektory