«Qasiretti qańtar» oqıǵasynan keıin halqymyz eń basty qundylyq – Táýelsizdik pen saıası derbestik, ulttyq birtutastyq pen beıbit turmys ekenin jete uǵynyp, onyń qadir-qasıeti men tarıhı mán-mańyzyn tereń túısindi.
Qandy qaqtyǵysqa ulasqan jappaı ereýil eń aldymen el birligine syna qaqty. Tynyshtyǵyn buzyp, qaýipsizdigine nuqsan keltirdi. Saldarynan kúshtik qurylymdardy qaıta qalyptastyrý, memlekettik tóńkeris jasamaq bolǵan teris pıǵyldy toptardy dereý jazaǵa tartý, azamattyq qoǵam men quzyrly organdardyń yntymaqtastyǵyn ornatý sharalary mezgil máselesine aınaldy. Bul týraly Memleket basshysy «Jańa Qazaqstan: Jańarý men jańǵyrý joly» atty halyqqa Joldaýynda jan-jaqty baıandap, keńinen túsindirdi.
Prezıdent jańa sıpattaǵy saıası ózgeristerdiń qarqynyn údetip, elimizdegi ornyqqan saıası júıeni keshendi jańǵyrtý arqyly qoǵamdaǵy jaýapkershilik pen senimniń artýyna jol ashatynyn, halyqqa kózben kórip, qolmen ustaýǵa bolatyn naqty nátıje men oń ózgeris usynatynyn málimdedi. Buǵan qosa saıası damý modelimizdi jańa jahandyq ahýalǵa beıimdeý úshin sýperprezıdenttik basqarýdy tarıh enshisine qaldyryp, jańa kezeńde kúshti Parlamentke súıenetin prezıdenttik basqarý júıesine ótetinin aıtty.
Qasym-Jomart Toqaev saıasattaǵy monopolııa daǵdarys pen áleýmettik keselge dýshar etetinin aıtyp, barlyq ókilettiktiń bir qolǵa shoǵyrlanýy kóppolıýsti partııalyq júıeniń qalyptasýyna múmkindik bermeıtinin jetkizdi. Memleket basshysy aldaǵy ýaqytta mundaı keleńsizdik joıylatynyn, ár bılik tarmaǵy óziniń quzyretine saı qyzmet etetinin jarııalady.
Prezıdenttiń memlekettik basqarý júıesin qaǵazbastylyqtan aryltýǵa baǵyttalǵan arnaıy Jarlyǵy jedel saıası sheshim qabyldaýǵa, tıimdi ári nátıjeli memlekettik basqarý júıesine kóshýge jol ashpaq. Al Ortalyq saılaý komıssııasy men Esep komıtetiniń, Konstıtýsııalyq Keńes tóraǵalarynyń, oblys ákimderi men olardyń orynbasarlarynyń eshbir partııanyń qyzmetine aralaspaýy, partııalardy tirkeý talabynyń jeńildetilýi syndy bastamalary saıası básekelestiktiń kórigin qyzdyratyny sózsiz.
Prezıdenttiń bastamasymen Parlament Májilisiniń úshten bir bóliginiń majorıtarlyq saılaý júıesi boıynsha saılanýy azamattardyń saılaý kezindegi belsendiligin arttyryp, saılanbaly organdarǵa ózin ózi usynýǵa múmkindik beredi.
Qasym-Jomart Toqaev Ulttyq qoǵamdyq senim keńesiniń ornyna Ulttyq quryltaı qurýdy usyndy. Memleket basshysynyń málimdeýinshe, Ulttyq quryltaı qoǵamdyq dıalogtyń ınstıtýsıonaldy modelin qalyptastyryp, halyq pen bılik arasynda altyn kópirge aınalady.
Prezıdenttiń bıylǵy Joldaýyn halqymyz úlken úmitpen kútti, jańa Joldaýda halyqtyń muń-muqtajy estilip, talap-tilegi eskerildi. Endigi maqsat – búkil el bolyp jumylyp, Joldaýda kóterilgen ıgi bastamalardy iske asyrý.
Qazaqstan halyq partııasy Mańǵystaý oblystyq fılıaly el Prezıdentiniń Joldaýyn keńinen nasıhattaý maqsatynda halyqpen kezdesý uıymdastyryp, óńirdiń áleýmettik-ekonomıkalyq salasyndaǵy ózekti máselelerdi suhbat alańdarynda jıi talqylaıdy. Sonyń ishinde óńirdegi agroónerkásip keshenin damytý, sharýa qojalyqtarynyń ahýalyna monıtorıng jasaý, halyqtyń ómir súrý sapasyn jaqsartý, saılaý júıesindegi jańǵyrtý úderisterine jastardyń belsendi qatysýyn qamtamasyz etý sekildi ózekti taqyryptardy kún tártibine qoıady. Jumyspen qamtý, memlekettik qyzmetkerlerdiń biliktiligin arttyrý, ǵylymdy damytý, údemeli ındýstrııalyq-ınnovasııalyq damý baǵdarlamasyn odan ári júzege asyrý, sot-quqyqtyq reformany jetildirý jáne memlekettik tildi damytý máselelerine de erekshe basymdyq beredi.
«Jumyla kótergen júk jeńil» demekshi, barlyǵymyz kirissek, Prezıdent júktegen tapsyrmalardyń oryndalatyny sózsiz.
Roza MAHAMBETOVA,
Qazaqstan halyq partııasy Mańǵystaý oblystyq fılıalynyń tóraǵasy