Qaraǵandy oblystyq memlekettik kirister departamentiniń sot úkimi shyqty. Sheneýnik alaıaqtyq jasady dep aıyptaldy. Sot 3,6 jylǵa bas bostandyǵynan aıyrý túrinde úkim shyǵardy, dep habarlaıdy Egemen.kz.
Qylmystyq is Qaraǵandy qalasynyń Qazybek bı aýdandyq sotynda qaraldy. Aıyptalýshylar oryndyǵynda memlekettik kirister departamentiniń qyzmetkeri jáne kásipker otyrdy. Sońǵysyna alaıaqtyqtan basqa, para berýge ıtermeledi degen aıyp taǵyldy.
Sotta salyq qyzmetkeri óz kinásin moıyndaǵan joq. Aıyptalýshynyń aıtýynsha, ol kásipkermen jeke baılanyspaǵan jáne odan aqsha almaǵan. Alaıda ol óziniń seriktesin aldaǵanyn moıyndady, oǵan sol kezde Qaraǵandy oblysynyń MAES-te qaralyp jatqan azamattyq is boıynsha oń sheshim shyǵarýǵa kómektesýge ýáde bergenin jetkizdi. Sondaı-aq ol seriktesinen 2,1 mıllıon teńge kóleminde aqsha alǵanyn, biraq aqshanyń shyǵý tegi týraly bilmeıtinin aıtty.
Ekinshi sottalýshy kinásin ishinara moıyndady. Ol kásipkerdi para berýge ıtermelemegenin málimdedi jáne oǵan qatysty alaıaqtyq jasaǵanyn moıyndady.
Sondaı-aq Qaraǵandy oblysynyń MAES tóreshisinen de jaýap alyndy. Ol sottalýshylarmen eshqashan jaqyn sóılespegenin, olardyń qylmystyq kelisimi týraly bilmegenin jáne olardan aqsha almaǵanyn aıtty.
Prokýror Memlekettik kirister departamentiniń qyzmetkerine memlekettik qyzmette jumys isteý quqyǵynan ómir boıyna aıyra otyryp, 5 jyl bas bostandyǵynan aıyrý túrindegi jaza taǵaıyndaýdy surady. Ekinshi sottalýshyǵa 4 jyl 8 aı merzimge bas bostandyǵynan aıyrý jazasyn taǵaıyndaýdy surady.
Qazybek bı aýdandyq soty sottalýshylardy kináli dep tanyp, 3,6 jylǵa bas bostandyǵynan aıyrdy. Bul rette memlekettik kirister departamentiniń qyzmetkerine úsh jyl merzimge memlekettik qyzmette qyzmet atqarýǵa tyıym salyndy. Ekinshi sottalýshyny memlekettik qyzmette ómir boıy jumys isteý quqyǵynan aıyrdy.
«Sot sottalǵandardyń asyraýynda jas balalardyń bolýy, olardyń bireýiniń múgedektigi jáne materıaldyq zalaldy óteý boıynsha sharalar qabyldaý kináni jeńildetetin jaǵdaı dep tanydy. Qylmystyq jaýapkershilik pen jazany aýyrlatatyn mán-jaılar anyqtalǵan joq», dep habarlady sotta.
Sot úkimi áli zańdy kúshine engen joq.