Ilııas Omarov atyndaǵy Qostanaı oblystyq qazaq drama teatrynda «Alashtyń Ahmeti» spektakliniń premerasy ótti. Drama-elegııa janryndaǵy sahnalyq týyndy ult ustazy Ahmet Baıtursynulynyń jer tutastyǵy men el bútindigin saqtap qalý jolyndaǵy jankeshti eńbegi men eldiń saıası-rýhanı turǵyda eńse túzeý jolyndaǵy qaıratkerligin beıneleıdi.
Qoıylymda Alash arysynyń aıaýly jary Bádrısafanyń aýyr taǵdyry men Ahańa degen azapty súıispenshiligi, ekeýiniń arasyndaǵy aınymas syılastyq pen qurmet sezimderi áserli baıandalady.
Shyǵarma avtory – dramatýrg-jazýshy О́ten Ahmet. Qoıýshy rejısseri – Qýandyq Qasym. Premerany tamashalaýǵa kelgen jurttyń kóptigi sonshalyq, kórermen zalynda ıne shanshar oryn qalmady desek bolady. Akterler sheberlikpen somdaǵan kórkem beıneler de nanymdy shyqqan. Ahań týraly alǵashqy qoıylymdy arnaıy kelip bastan-aıaq kórip shyqqan oblys ákimi de teatr qorjynyna taǵy bir sátti týyndynyń qosylǵanyn atap ótti.
– Búgingi tamasha qoıylymdy óńir sahnagerleriniń Ahańnyń rýhyna jasaǵan taǵzymy deýge bolady. Ahmet Baıtursynuly men Bádrısafanyń arasyndaǵy súıispenshilik, syılastyq sezimi, ult ustazynyń elge degen mahabbaty, óz isine degen adaldyǵy, halqyna degen perzenttik boryshy óte sátti somdalǵan. Spektakldiń avtory men qoıýshy rejısserge, sondaı-aq teatrdyń barlyq shyǵarmashylyq ujymyna shynaıy alǵysymdy bildiremin. Sahnadan úlken eńbektiń jemisin kórdik. Bul – Ilııas Omarov atyndaǵy oblystyq teatrdyń Ahańnyń 150 jyldyq mereıtoıynda óńir turǵyndaryna jasaǵan tamasha tartýy, – dedi A.Muhambetov.
Premera ótken kúni teatrdyń kireberis dálizinde ult ustazynyń ǵylymı murasy men ómir kezeńderinen syr shertetin kórme ashylyp, qalyń kórermen Ahańnyń ǵumyrnamasyna qatysty qundy arhıv qujattarymen tanysty.