Fınlıandııa astanasy – Helsınkı men Tampere qalalarynda ótip jatqan shaıbaly hokkeıden álem chempıonatynyń toptyq kezeńdegi úshinshi týr oıyndary aıaqtaldy. Bul týrda Qazaqstan ulttyq quramasynyń hokkeıshileri álemdik dodaǵa qatysyp jatqan elder arasyndaǵy reıtıngte kósh bastap turǵan Shveısarııamen sheberlik baıqasty. Asa tartysty ótken kezdesýde jerlesterimiz bir shaıba aıyrmashylyǵymen jeńilip qaldy – 3:2.
Shveısarııa quramasy alǵashqy eki týrda Italııa (5:2) men Danııa (6:0) quramalaryn iri eseppen qapy qaldyrǵannan keıin shaıbaly hokkeı mamandary úshinshi týr aldynda olar Qazaqstandy da qalpaqpen uryp alady dep boljam jasaǵan edi. Alaıda ár týr saıyn oıyny qalyptasyp kele jatqan qazaqstandyq hokkeıshiler bul joly «A» tobynyń týrnır kestesinde ekinshi orynda turǵan shveısarııalyqtarǵa laıyqty qarsylyq kórsetti. Tipti alǵashqy 20 mınýtta jerlesterimiz Shveısarııamen teń túsip, qarsylastardyń shaıba soǵýyna múmkindik bermedi. Patrık Fısher shákirtteri alǵashqy eki týrdyń birinshi kezeńinde-aq Italııa qaqpasyna – bir, Danııaǵa úsh shaıba soqqanymen, bul joly Shýtov qaqpasynan sańylaý taba almaı, ábden pushaıman boldy.
Alaıda ekinshi kezeńdi óte belsendi bastaǵan shveısarııalyq hokkeıshiler kezdesýdiń 24-mınýtynda esep ashty. Goldyń avtory – Denıs Malgın. Qazaqstandyq hokkeıshilerde osy kezeńniń ózinde-aq tarazy basyn teńestiretin keremet múmkindikter bolǵanymen, sońǵy sátte jıi múlt ketip jatty. Esesine kezeńniń sońyna taman Darıo Sımıon esepti eselep ketti – 2:0. Ekinshi aınalymda soǵylǵan ekinshi shaıba qorǵaýshy Samat Danııardyń qateliginen keıin Andreı Shýtov qorǵaǵan qaqpa torynan tabyldy.
Úshinshi kezeńniń 46-mınýtynda bizdiń qurama muzaıdynda bir oıynshy kem oınasa da, esep aıyrmasyn qysqartýǵa múmkindik aldy. Kezekti qarsy shabýyl kezinde qorǵaýshy Djessı Bleker shaıbany óz aımaǵynan qarsylastyń aımaǵyna deıin aparyp, orta qashyqtyqtan qaqpaǵa baǵyttaǵan shaıbasynyń aldynda shveısarııalyq qorǵaýshylar da, qaqpashy da dármensiz qaldy – 2:1. Biraq arada kóp ótpeı Shveısarııa quramasy esep aıyrmasyn qaıta ulǵaıtty – 3:1. Matchtyń 56-mınýtynda Danıel Gersog óz komandasynyń basymdyǵyn arttyrǵanymen, oıynnyń aıaqtalýyna eki mınýt qalǵanda qazaqstandyq qorǵaýshy Valerıı Orehov quramanyń ekinshi shaıbasyn soqty. Tarazy basyn teńestirý úshin Iýrıı Mıhaılıs oıynnyń sońǵy mınýttarynda qaqpashynyń ornyna altynshy oıynshyny shyǵarǵanymen, onysy báribir nátıje bermedi.
Qazaqstan quramasy bul oıynda jeńilse de, aldyńǵy eki matchpen salystyrǵanda táýir oıyn kórsetti. Qaqpashy Andreı Shýtovtyń da keshegi oıynda jasaǵan erligin erekshe atap ótken jón. Ol 60 mınýtta qarsylastyń 40 soqqysyn qaıtara bildi. Al bul oıynda Qazaqstan quramasynyń eń úzdik oıynshysy dep qorǵaýshy Valerıı Orehov tanyldy. Oǵan marapatty osy oıyndy tamashalaýǵa barǵan Mádenıet jáne sport mınıstri Dáýren Abaev tapsyrdy.
Match aıaqtalǵan soń Qazaqstan ulttyq quramasynyń bas bapkeri Iýrıı Mıhaılıs bylaı dedi: «Búgin eki qurama da jaqsy oıyn kórsetti. Jigitter muzaıdynǵa kóterińki kóńil kúımen jeńiske jetemiz degen qulshynyspen shyqty. Ony ózderińiz de baıqadyńyzdar dep oılaımyn. Barlyq hokkeıshi oıynnyń ár sátinde jeńiske jetý úshin baryn saldy. Bizde shaıba soǵyp, tarazy basyn ózimizge qaraı aýdaratyn jaqsy múmkindikter boldy. Biraq shabýyldyń núktesin qoıatyn oıynshy tabylmaı jatty. Al bizdiń qaqpaǵa goldyń bári óz qateligimizdiń saldarynan soǵyldy. Dese de jigitter eńsesin túsirmeı, sońǵy mınýtqa deıin baryn saldy».
Toptaǵy ózge oıyndarǵa toqtasaq, Kanada Slovakııany jeńse (5:1), Danııa hokkeıshileri ıtalııalyqtardan bir shaıba aıyrmashylyǵymen basym tústi (2:1). Germanııa quramasy da Fransııany 3:2 esebimen utty. «A» tobynyń týrnır kestesinde Shveısarııa men Kanada quramalary 9 upaımen kósh bastap tur. Qazaqstan quramasy kelesi kezdesýin búgin dál osy Úıeńki japyraqtary eliniń komandasymen ótkizedi. Match elorda ýaqytymen 23:20-da bastalady.
«V» tobynyń týrnır kestesinde de eki qurama kósh bastap keledi. Shvesııa úshinshi týrda Ulybrıtanııany 6:0 esebimen jeńse, Fınlıandııa AQSh-tan aılasyn asyrdy (4:1). Bul quramalarda 9 upaıdan bar. Aýstrııa býllıt serııasynda Chehııadan (2:1), Latvııa Norvegııadan basym túsip (3:2), chempıonattaǵy alǵashqy jeńisterine qol jetkizdi.