Memleket basshysy Qasym-Jomart Toqaev elimizdiń túkpir-túkpirindegi shaǵyn jáne orta bıznes ókilderiniń basyn qosyp, kezdesý ótkizdi. Jıynda kásipkerlik salasyndaǵy ózekti máseleler talqylandy.
Prezıdent buǵan deıingi kezdesýde iri bıznes ókilderine basymdyq berse, bul joly shaǵyn jáne orta bıznes ókilderi nazarǵa alyndy. Shamamen 80-ge jýyq kásipker jıyldy. Birqatar másele kóterildi. Atap aıtqanda, salyq saıasatyna, pandemııadan keıingi tekserý, ımport, óńirlerdegi kásipkerlikti damytý máselelerine nazar aýdaryldy.
«Atameken» ulttyq kásipkerler palatasynyń tóralqa tóraǵasy Raıymbek Batalov shaǵyn jáne mıkrobıznestiń birqatary «kóleńkede» júrgendikten, barlyǵyna birdeı salyq júıesin engizý bastamasyn kóterdi. Sondaı-aq tekserýdi toqtatýdy taǵy bir jylǵa, ıaǵnı 2024 jyldyń 1 qańtaryna deıin uzartýǵa qatysty bastama kóterip jatyrmyz.
Jalpy, bıznes salasynda qordalanǵan biraz másele bar. Prezıdenttiń qoldaýynyń arqasynda kásipkerlik damıdy dep oılaımyn. Mysaly, shaǵyn jáne orta bıznestiń úlesi – 34,7 paıyz. Alaıda bul kórsetkish damyǵan elderde 50 paıyzdan joǵary. Atalǵan kórsetkishke jetý úshin «Atameken» de aýqymdy jumys atqaryp jatyr.
Bizdiń esepteýimiz boıynsha, 2020 jyly 31 myńǵa tarta kásipker óz isin toqtatty. Biraq qazir kásipkerliktiń sany artqanyn kórip otyrmyz. Ulttyq ekonomıka mınıstrliginiń derekterine súıensek, 1,4 mln-nan astam kásipkerlik sýbektisi bar. Olar 3,5 mln adamdy jumyspen qamtyp otyr. Degenmen áleýetimiz budan da joǵary. Ol úshin iri, alpaýyt kompanııalar tapsyrysty jergilikti kásiporyndarǵa berýi kerek.
Baýyrjan ORAZǴALIEV,
«Atameken» ulttyq kásipkerler palatasynyń Apparat basshysy