Sınoptıkter 12 oblys aýmaǵynda daýyldy eskertý jarııalady, dep habarlaıdy Egemen.kz.
20 maýsymda Qostanaı oblysynyń batysynda, shyǵysynda naızaǵaı oınap, burshaq jaýyp, daýyl soǵýy yqtımal. Soltústik-batystan soǵatyn jel ońtústiktik-shyǵysqa aýysady, jeldiń kúshi 15-20 m/s jetedi.
Kúndiz Batys Qazaqstan oblysynyń soltústiginde, soltústik-shyǵysynda naızaǵaı oınaıdy, burshaq jáne daýyl bolady. Jel ońtústik-batystan, batystan soǵady, kúndiz oblystyń soltústik bóliginde, ortalyq bóliginde ekpini 15-20 m/s.
Oral qalasynda kúndiz naızaǵaı, burshaq, daýyl kútiledi. Jel batystan soǵady, kúndiz ekpini 18 m/s jetedi.
20 maýsymda Aqmola oblysynyń basym bóliginde ótkinshi jańbyr jaýady, naızaǵaı jarqyldaıdy. Oblystyń soltústiginde, batysynda burshaq jaýýy múmkin. Ońtústik-batystan soǵatyn jel soltústik-batysqa aýysady, naızaǵaı kezinde ekpini 15-20 m/s bolady.
Kókshetaý qalasynja álsin-álsin naızaǵaı jarqyldaıdy.
20 maýsym kúndiz Atyraý oblysynyń soltústiginde, ońtústiginde jáne ortalyǵynda jel soǵady ekpini 15-20 m/s.
Atyraýda soltústik-batystan, batystan jel soǵady, kúndiz ekpini 15-18 m/s jetedi.
Erteń kúndiz Aqtóbe oblysynyń soltústiginde naızaǵaı oınaıdy. Soltústik-batystan jel soǵady, kúndiz oblystyń soltústiginde ekpini 18 m/s bolady.
20-22 maýsymda Ile, Jetisý Alataýy boıynda jańbyr jaýady. Keı ýaqytta naızaǵaı oınaıdy. 21-22 maýsym keı jerlerde burshaq jaýyp, daýyl soǵady.
20 maýsymda tańerteń jáne kúndiz Qyzylorda oblysynyń ońtústiginde, ortalyǵynda naızaǵaı, daýyl kútiledi. Kúndiz oblystyń soltústiginde shańdy daýyl turady. Jel soltústik-batystan soǵady, oblystyń soltústiginde, ońtústiginde, ortalyǵynda kúshi 15-20 m/s deıin jetedi. Oblystyń basym bóliginde tótenshe órt qaýpi saqtalady.
Shyǵys Qazaqstan oblysynda, Qyzylorda tótenshe órt qaýpi saqtalady.
20 maýsymda Túrkistan oblysynyń taýly aýdandarynda qatty jańbyr, burshaq kútiledi. Keı ýaqytta naızaǵaı oınap, daýyl soǵýy yqtımal. Oblystyń soltústiginde, batysynda shańdy daýyl turady. Soltústik-batystan jel soǵady, oblystyń soltústiginde, batysynda, taýly jáne taý bókterli aýdandarynda 15-20, ekpini 23 m/s. Shymkent jáne Túrkistan qalalarynda da dál osyndaı aýa-raıy bolady.
Erteń Almaty oblysynyń batysynda shańdy daýyl bolýy yqtımal. Ońtústik-batystan jel soǵady, kúndiz batysta, shyǵysta jáne oblystyń taýly aýdandarynda ekpini 17-22 m/s jetedi. Kúndiz 35 gradýs ystyq bolady.