Petropavl qalasynyń 38 jastaǵy turǵyny barar jeri, basar taýy bolmaǵannan keıin 4 ul-qyzymen orman ishindegi jerkepeni panalaýǵa májbúr bolyp otyr. Páter jaldaıyn dese, tapqan-qapqany bala-shaǵanyń nápaqasynan artylmaıdy. Qurqyltaıdyń uıasyndaı baspananyń aýmaǵy bar-joǵy 20 sharshy metr. Úıdiń ishi elektr qýatymen ǵana jylytylady. Balalardyń aldy 7-ge tolsa, kishisi emshekte. Mektepte oqıtyndary alty shaqyrym jerge kún saıyn jaıaý-jalpylap qatynaıdy.
Aqqý Baıdildına byltyr jeltoqsanda kenjesi Dámelini dúnıege ákelisimen birden úıine suranǵan. Sebebi, qystyń kózi qyraýda terezeden qarap, analaryn zaryǵa kútip otyrǵan 3 balasynyń jaıy qabyrǵasyna qatty batqan. Kópbalaly ana ne peshi, sýy joq, edenderi men qabyrǵalary jup-juqa úıdi 1 mıllıon teńgege satyp alyp, alypsatarlardyń qarmaǵyna túsip qalsa kerek. Osylaısha, soltústiktiń qytymyr qysyn ázer ótkergen jaıy bar.
Aqtaýda oblystyq qarjy polısııasynda aǵa leıtenant bolyp qyzmet etken áıel qazir dekrettik demalysta. 3 jyl buryn kúıeýinen ajyrasyp, týǵan jeri – Petropavlǵa kelgen. Garajyn satyp, oǵan bar jıǵan-tergenin qosyp, qaıyńdy orman ishindegi saıajaıǵa qolyn ázer iliktirgenge uqsaıdy. Jańbyr sál-pál sebelep ótse, mı batpaqqa oranǵan jolmen júrý – bir mashaqat. Balalar da, ózi de aýrýshań. Páter kezeginde 2765-shi bolyp tur. Byltyr bul kezek 200 adamǵa ǵana jyljyǵan. Burynǵy kúıeýi tóleıtin alıment pen balalardyń járdemaqysyn qosqanda otbasylyq tabys 40 myń teńgeden aspaıtyn kórinedi.
О́mir ESQALI,
«Egemen Qazaqstan».
Soltústik Qazaqstan oblysy.