Shyǵarmashylyq úıirmeler men sport seksııalaryn qarjylandyrýǵa qosymsha 97 mlrd teńge qajet. Bul týraly Mádenıet jáne sport mınıstri Dáýren Abaev aıtty, dep habarlaıdy Egemen.kz.
«Búgin osy jerge el azamattaryn tolǵandyryp júrgen asa mańyzdy suraqty talqylaý úshin jınalyp otyrmyz. Áńgime shyǵarmashylyq úıirmeler men sport seksııalaryn jan basyna shaqqandaǵy qarjylandyrý júıesiniń ári qaraıǵy jumysy týraly bolady. Qazir 495 myń bala 15 myń úıirme men seksııaǵa barady. Oǵan 32 mıllıard teńgeden asa qarajat bólindi. Jyl sońyna deıin qosymsha 97 mlrd teńge qajet. Aıtylatyn syn men qoıylatyn suraqtardyń aldynda bir ǵana dúnıeni aıtqym keledi: artsport – buqaralyq sportty damytýdyń jalǵyz mehanızmi emes», dedi Dáýren Abaev Ortalyq kommýnıkasııalar qyzmetindegi baspasóz máslıhatynda.
Onyń dereginshe, búginge deıin 41 dene shynyqtyrý-saýyqtyrý keshenin iske qosý arqyly jaqsy nátıjege qol jetkizildi. Onyń 32-si aýdan ortalyqtary men aýyldyq jerlerde ashyldy.
«Sonymen qatar aýyldyq jerlerde sporttyq is-sharalar men seksııalardy uıymdastyrýǵa jaýapty 3 064 jattyqtyrýshy jumysqa alyndy. Jastardy sportqa tartý úshin ótken jyly basketbol, voleıbol, fýtzal, qazaqsha kúres, ústel tennısi sııaqty sport túrlerinen mektepishilik jáne stýdentter arasynda ulttyq lıgalar ótkizildi. Bilim berý júıesiniń barlyq deńgeıinde dene shynyqtyrý pániniń ustazdaryna sabaqtan tys is-sharalardy ótkizgeni úshin qosymsha aqy taǵaıyndaldy. Iаǵnı, bul rette 30 myńnan astam dene tárbıesiniń muǵalimi qamtyldy. 2022-2024 jyldary atalǵan maqsatta aımaqtarǵa qosymsha 21 mlrd teńge bólinedi», dedi ol.
Mınıstrdiń dereginshe, búginge deıin balalardy qosymsha sport seksııalarymen, úıirmelermen qamtý 73 paıyzdy qurap otyr.
«Jan basyna shaqqandaǵy qarjylandyrý júıesi men bilim berý uıymdaryndaǵy seksııalardan bólek, balalar men jasóspirimderdi oqytatyn sport mektepterinde taǵy 386 myń bala bilim alýda. 2022 jyly qarjylandyrýdyń jalpy kólemi 123,7 mlrd teńgeni quraıdy», dedi Dáýren Abaev.
Aıana Toǵanbek