Qazaqstan Úkimeti men Azııa damý banki Astanada elektr poıyzdary júıesin qurý jobasyn qarjylandyrýǵa ýaǵdalasty. Bul joba astanalyqtardyń ómir sapasyn arttyrýǵa jáne qalaishilik qozǵalysty jyldamdatýǵa múmkindik beredi.
Qazirdiń ózinde elordamyzda Smart Astana(«Aqyldy qala») jobasy iske asyryla bastady. Bul zamanaýı tehnologııa boıynsha júzege asatyn jobanyń alǵashqy kezeńinde eki baǵyt – «Qaýipsiz qala» jáne «Intellektýaldyq kólik júıesi» jobasy qolǵa alynady. Al, 2017 jylǵa deıin «Aqyldy qala» júıesi tolyǵymen iske asyrylady.
Smart Astana jobasy eýropalyq «aqyldy qalalardyń» úlgisi boıynsha ázirlendi. Joba nátıjesinde qalada ómir sapasy artyp, ınfraqurylym jaqsarady, qoǵamdyq qaýipsizdik oń sheshimin tabady. Aıtalyq, «Intellektýaldyq kólik júıesi» aıasynda «aqyldy baǵdarshamdar» paıda bolady. Bul júıe joldarda kólik keptelisin boldyrmaıdy. 2014 jyldyń ózinde osyndaı 42 baǵdarsham Saryarqa, Turan, Qonaev, Dostyq, Saraıshyq, Syǵanaq kóshelerinde ornalastyrylady. Joba boıynsha ásirese, qoǵamdyq kólik qurylymyn damytýǵa aıryqsha nazar aýdarylady.
Qalada jeńil relstik kólik júıesi qurylysy bastalyp, arnaıy úlken avtobýstar iske qosylady. Olar beınebaqylaý, júrgizýshini qadaǵalaý basqa da saqtyq qurylǵylarymen qamtamasyz etilgen. Kóshelerdegi jol qozǵalysy sýret-beıne tárkileý júıelerimen jasaqtalyp, qozǵalys erejesin saqtaý avtomatty túrde baqylanatyn bolady. Barlyq aqparattar naqty ýaqyt rejiminde arnaıy jedel basqarý ortalyǵyna túsedi. Kóshelerde ortalyq operatorlarymen shuǵyl baılanys jáne anyqtamalyq aqparattar alý termınaldary ornatylady.
Jedel basqarý ortalyǵynyń qurylysyn 2014 jyly salý josparlanǵan. Ǵımarat alańy 5300 sharshy metrdi quraıdy, tóbesine ǵımaratty jaryqtandyratyn jalpy alańy 600 «sharshylyq» kún sáýlesinen nár alatyn qurylǵy qoıylady. Ortalyqqa derekterdi tabystaý jelisi arqyly onlaın rejiminde qoǵamdyq qaýipsizdik, kommýnıkasııalar, qalalyq qyzmet kórsetý, kóliktik keptelister, kásiporyndar jumysy týraly aqparattar túsip turady. Onda 200-ge jýyq adam jumysqa tartylmaq, olardyń qatarynda múmkindigi shekteýli jandarǵa basymdyq beriledi.
Elektr poıyzdary júıesi – Astana áýejaıynan qala ortalyǵyna deıingi 14 shaqyrymdyq aralyq; qala ortalyǵynan Astananyń soltústik bóligine jáne ortalyq temirjol vokzalyna deıingi 8 den 10 shaqyrymǵa deıingi qashyqtyq; joldy ortalyqta túıistiretin 18 shaqyrymdyq aralyq baǵyttaryn qamtıdy. Negizinen elektr poıyzdary jelisi qalaishilik qozǵalysty jyldamdatýǵa jol ashatyn zamanaýı tramvaılardan turady.
Azııa damý banki Qazaqstan Úkimetiniń shaqyrýy boıynsha jobanyń daıyndyǵyn qamtamasyz etý jáne keshendi tekserý jumystaryn júrgizý úshin tehnıkalyq kómek kórsetetin bolady. Sonymen birge, jobany júzege asyrý úshin Azııa damý banki qajetti qarajat bóldi. Halyqaralyq keńesshiler atalǵan júıeniń qurylysy kezinde qandaı da bir qatelikke jol bermeýge qolǵabys etedi, al, Banktiń uzaq merzimge berligen qarjysy jobany qysqa ýaqyt ishinde, naqtyraq aıtsaq, 2017-shi jylǵa deıin tolyqtaı júzege asyrýǵa múmkindik beredi.
«Egemen-aqparat».