QYZYLORDA. 25 sáýir. Qyzylordadaǵy A.S.Makarenko atyndaǵy balalar úıiniń tárbılenýshileri jergilikti kásipker, Qazaqstannyń Eńbek Eri Abzal Eralıev basqaratyn «Abzal jáne K» tolyq seriktestiginiń aýyl sharýashylyǵy óndirisimen tanystyryldy. Bul týraly egemen.kz tilshisi habarlady.
Oblystyń Syrdarııa aýdany aýmaǵynda ornalasqan N.Ilııasov atyndaǵy aýylǵa balalar úıiniń shákirtteri osy maqsatta keldi. Oblystyq kásipkerler palatasy men balalar úıiniń basshylyǵy uıymdastyrǵan bul kezdesýde jetkinshekter seriktestiktiń jyly jaıy men zaman talabyna saı jabdyqtalǵan 2 kúrish óńdeý zaýytynyń jumysyn kórdi. «Abzal jáne K» agrofırmasyndaǵy qaınaǵan eńbekke jáne ornatylǵan jańa tehnologııalarǵa qyzyǵa qarap ári kókeılerindegi saýaldarǵa qoıǵan oqýshylarǵa kásiporyn jetekshisi egjeı-tegjeıli jaýap qaıtardy. Balalarǵa, ásirese, A.Eralıevtiń «Bizdiń kásiporyn úlken tabysqa tek eńbek arqyly jetti. Sender de óz maqsattaryńa osy eńbek pen shydamdylyq, tózim arqyly jete alatyndaryńdy bilýleriń kerek», – degen sózi aıryqsha unady.
Balalardy «Abzal jáne K» jumysymen tanystyrýǵa bastap kelgen apaılary – pedagog-psıholog Aqmaral Eldesbaeva: «Búgin bizdiń oqýshylarymyz seriktestiktiń tynys-tirshiligine qyzyǵýshylyq bildirdi. Balalardyń mundaǵy kórgenderi keleshekte ózderiniń mamandyq tańdaýlaryna áserin tıgizedi dep oılaımyn», – dedi.
Al Qyzylorda oblystyq kásipkerler palatasynyń dırektory Dinmuhamed Ábsattarov jastardy aýyl sharýashylyǵy óndirisimen tanystyrýdaǵy negizgi maqsattaryn túsindire kelip: «Oblystyq kásipkerler palatasy men bilim berý basqarmasy birlese jastarǵa kásiptik baǵdar berý sharalaryn júrgizýde. Qazir bilikti mamandar tapshy bolǵandyqtan, mundaı is sharalardyń mańyzyn bilim salasyndaǵylar tereń túsinýde. Sondyqtan, keleshekte júıeli túrde mektep oqýshylaryn suranysqa saı mamandyqtarǵa beıimdeý jumystaryn jalǵastyra beremiz», – dedi.
«Abzal jáne K» seriktestigindegi qaınaǵan eńbekpen tanysqan jetkinshekterge oblystyq kásipkerler palatasy tarapynan estelik-syılyqtar tapsyryldy.
Joldybaı Bazar.
Derekkóz: egemen.kz.
Foto: Qyzylorda oblystyq kásipkerler palatasy.