Bıyl Qostanaı memlekettik pedagogıka ınstıtýtynyń qurylǵanyna 75 jyl tolady. Instıtýt basshylyǵy bilim ordasynyń osy merekesin jas urpaq úshin paıdaly, iz qalarlyq ispen atap ótýdi oılastyryp otyr.
Instıtýt rektory, professor Qýat Baımyrzaevtyń bastamasymen ulttyq mekteptiń negizin qalaǵan, qazaq dalasyna bilim dánin sepken aǵartýshy ustaz Ybyraı Altynsarınniń ómiri men muralaryn zertteı túsý jáne nasıhattaý maqsatymen ybyraıtaný ǵylymı ortalyǵy qurylǵan bolatyn. Az ýaqyttyń ishinde ortalyq jumysyn qyzý bastap ta ketti. Endi Altynsarın dárishanasyn ashty. Dárishanada Ybyraı ómirbaıany, ustazdyq joly, uly ustazdyń ataqty shákirtteriniń sýretteri ilingen.
– Instıtýtymyzdyń ereksheligi – biz mektepke muǵalimder daıyndaımyz. Orta bilim berý salasyn bilikti kadrlarmen qamtamasyz etý máselesi óte ózekti qoıylyp otyr. Al uly ustaz «Muǵalim – mekteptiń júregi» degen bolatyn. Bizdiń bolashaq muǵalimder Ybyraı Altynsarınniń ómirin, shyǵarmalaryn, ádistemelerin bilýi tıis. Sondyqtan pedagogıka ǵana emes, jalpy bilim berý isindegi iri tulǵanyń atynda dárishana bolýy kerek, – dedi ınstıtýt rektory Qýat Baımyrzaev. Dárishana tusaýkeserinde ustazdar, qaladaǵy zııaly qaýym ókilderi kemeńger ustaz atyndaǵy dárishananyń ashylýynda professor Amanjol Kúzembaıuly, aqyndar Aqylbek Shaıahmet, Ásııa Berkenova, Naǵashybaı Muqatov, ólketanýshy Qýanysh Ormanov Ybyraıdy jas urpaqqa nasıhattaı berý kerektigin tilge tıek etti. Sonymen qatar, osy shara aıasynda belgili aqyn, fılologııa ǵylymdarynyń kandıdaty Serikbaı Ospanovtyń ybyraıtaný ǵylymı ortalyǵynda daıyndalǵan «Uly ustaz ulaǵaty» atty kitabynyń tusaýkeseri ótti.
Názıra JÁRIMBETOVA,
«Egemen Qazaqstan».
QOSTANAI.