Keptelisten kóz ashpaıtyn elordadaǵy Turan dańǵylyna kelesi jyly jóndeý jumystary júrgizilip, kóshe keńeıe túsedi. Bul týraly Nur-Sultan qalasynyń ákimi Altaı Kólginov Ortalyq kommýnıkasııalar qyzmetinde ótken brıfıngte málimdedi, dep habarlaıdy Egemen.kz.
Buǵan deıin shahardaǵy Túrkistan jáne Máńgilik el kóshelerindegi joldy ekige bólip turǵan qurylystar tolyǵymen súrilip, kólikterdiń erkin qatynaýyna jol ashylǵan bolatyn. Endigi kezekte dál osyndaı jumys Turan dańǵylynda da iske asyrylmaq.
«Turan dańǵylyna qatysty da osyndaı josparymyz bar. Qazir jobalap jatyrmyz. Onyń bárine demontaj jasap, kósheni keńeıtemiz. Sonda eki jaqtan da solǵa burylý jeńil bolady. Ol josparymyzda bar. Bul jumys kelesi jyly iske asyrylady. Bıyl úlgere almaımyz», dedi qala basshysy.
Budan bólek, Altaı Kólginov Nur-Sultanda 146 problemaly ýchaskede sý basý máselesi sheshilgenin atap ótti. Onyń ishinde jańbyr jaýǵan kezde qalanyń eń problemaly aýmaǵy sanalatyn B.Momyshuly dańǵylyndaǵy másele tolyǵymen sheshilgen eken.
«Qala boıynsha 130 shaqyrymnan astam nóser kárizi men aryq-naýa júıesi salyndy, 1 myńǵa jýyq baqylaý jáne jańbyr qabyldaǵysh qudyq, sondaı-aq 20 km kollektor tazartyldy, 6,5 myń qubyr býlandyrylyp, 350 tonnaǵa jýyq tunba qaldyq shyǵaryldy. Budan basqa, Jastar shaǵyn aýdanynda (Táshenov pen Amman kósheleriniń qıylysy) jetkizýshi kollektorlardy qaıta jańǵyrtý arqyly tazartý qurylysy salyndy. Ol Táshenov, Baraev, Ýálıhanov, Pýshkın, Imanbaev kósheleriniń, Respýblıka, Táýelsizdik dańǵyldarynyń joǵarǵy bóliginde sý basý máselesin sheshýge múmkindik berdi», dedi elorda ákimi Altaı Kólginov.