Qazaq ádebıetiniń alyp báıteregi Sherhan Murtazanyń ómiri men shyǵarmashylyǵyna qatysty kez kelgen qyzyqty derek oqyrmandy beıjaı qaldyrmasy anyq. Tipti Sheraǵanyń mektepti qandaı baǵamen aıaqtaǵany da eldi eleń etkizbeı qoımasy sózsiz.
Sherhan Murtazanyń attestatyna kóz júgirtkende, kileń bestik baǵanyń arasynan bir tórt jáne úsh degen baǵany kóz shaldy. Ádebıet áleminiń aldaspany 1947-1950 jyldary burynǵy Jambyl qalasyndaǵy Jambyl atyndaǵy mektepte bilim alǵany belgili. Qaıratker qalamgerdiń atalǵan bilim ordasynda alǵan attestatynan baıqaǵanymyz, barlyq sabaqty derlik «óte jaqsy» degen baǵaǵa aıaqtapty. Tek geometrııa pániniń muǵalimi úsh degen baǵa qoısa, orys ádebıeti pániniń muǵalimi Sherhan Murtazanyń bilimin tórtke baǵalapty. Geometrııany úshke támamdaǵan Sheraǵanyń algebradan bes alǵany da qyzyq.
Álbette, baqytyn bilimnen izdegen qalamgerge attestattaǵy úsh jáne tórt degen baǵalar Máskeýde bilim alyp, alty alashtyń maqtanyshyna aınalýyna esh kedergi keltirmegeni málim.
Jambyl oblysy