AQSh-tyń Nıýport qalasynda uıymdastyrylǵan tennısten ATP 250 týrnıriniń fınalyna shyqqan Qazaqstannyń birinshi, álemniń 42-raketkasy Aleksandr Býblık bas júlde úshin ótken básekede jeńilip qaldy.
Qazaqstandyq tennısshi osyǵan deıin bes ret ATP dodalarynyń fınalynda oınap, tek sonyń bireýinde ǵana, bıylǵy Monpeledegi týrnırde chempıon atanǵan edi. Bul jolǵy fınalda A.Býblık álemniń 41-raketkasy amerıkalyq Maksım Kressımen bas júldeni sarapqa saldy. Birinshi partııa barysynda qos breık jasaǵan qazaqstandyq tennısshi basym boldy – 6:2. Ekinshi sette de otandasymyz 3:0 esebimen alǵa ketkenimen, qatarynan alty geımde qarsylasyna ese jiberip, 3:6 nátıjesimen jeńilip qaldy. Al úshinshi, sheshýshi partııada match taǵdyry taı-breıkte sheshilip, bul jerde amerıkalyq tennısshi jeńiske jetti – 7:6 (7:3).
Sondaı-aq elordadaǵy ITF sanatyna enetin erler arasynda M25 týrnıriniń fınalynda oınaǵan otandasymyz Beıbit Juqaev ta bas júldege synyq súıem qalǵanda súrindi. Fınalda álemniń 408-shi, osy jarystyń 5-raketkasy retinde tirkelgen ózbekstandyq Sergeı Fomın otandasymyzdy úsh sette (6:4, 2:6, 6:4) qapy qaldyryp, jarys jeńimpazy atandy.