Nur-Sultanda 1-9 qazan aralyǵynda alǵash ret Astana Open ATP 500 týrnıri ótedi, dep habarlaıdy Egemen.kz.
Qazaqstan tennıs federasııasynyń málimetinshe, Qazaqstanda mundaı deńgeıdegi jarys alǵash ret uıymdastyrylyp otyr. Bul ATP-nyń China Open jarysyn Beıjińnen elordaǵa aýystyrý týraly sheshiminen keıin múmkin boldy. ATP 500 «Úlken dýlyǵa» jáne ATP Masters 1000 dodalarynan keıingi úshinshi deńgeıdegi jarys bolyp esepteledi. Oıyndar Esil jaǵasyndaǵy kórikti jerge oryn tepken Ulttyq tennıs ortalyǵynyń korttarynda bolady.
«ATP-nyń Qazaqstanǵa osyndaı deńgeıdegi jarysty ótkizýdi senip tapsyrǵanyna qýanyshtymyn. Bul elimizde tennısti damytý úshin álemdik ozyq tájirıbeni paıdalanýdaǵy baǵytymyzdyń durystyǵyn kórsetedi», dedi Qazaqstan tennıs federasııasynyń prezıdenti, Halyqaralyq tennıs federasııasynyń (ITF) vıse-prezıdenti Bolat О́temuratov.
Aıta keteıik, Astana Open-ge álemdegi úzdik 10 tennısshiniń qataryna kiretin sportshylar qatysady. Sonyń ishinde álemniń 1-raketkasy, AQSh ashyq chempıonatynyń jeńimpazy, reseılik Danııl Medvedev bar.