Bul kúnderi Italııa astanasy – Rımde 17 jasqa deıingi balýandar arasyndaǵy álem chempıonaty ótip jatyr. Jasóspirimderdiń jahandyq básekesinde qazaqstandyq balýandar da óner kórsetýde.
Jarystyń alǵashqy kúninde grek-rım kúresiniń balýandary júldelerdi sarapqa saldy. Bul synda el namysyn qorǵaǵan eki sportshymyz júldeger atandy. Atap aıtar bolsaq, 48 kıloǵa deıingi salmaqta kúresken Arsen Juma qola júlde úshin ótken beldesýde armenııalyq Tıgran Galstıannan basym tússe (5:3), 60 kıloda baq synaǵan Iýsýf Ashrapov el qorjynyna ekinshi qola júldeni saldy. Ol úshinshi oryn úshin ótken kezdesýde ırandyq Abolfazl Hosseın Mırshekarmen kúsh synasyp, asa tartysty ótken jekpe-jekte 11:10 esebimen jeńiske jetti.
О́kinishke qaraı, Beknur Muqan men Serǵazy Ábdihadyr (65 kg) qola júlde úshin beldesýde ırandyq jáne ózbekstandyq qarsylastarynan jeńilip qaldy. Grek-rım kúresinen jalpykomandalyq esepte Iran quramasy kósh bastasa, Ázerbaıjan men Grýzııa úshtikti túıindedi. Keshe bozkilemge burymdy balýandar shyǵyp, ózara kim myqtyny anyqtady.