Mınıstrlikter úıinde «Bas redaktorlar klýby» QB músheleriniń Tótenshe jaǵdaılar mınıstri Vladımır Bojkomen kezdesýi boldy. Basqosý beıresmı turǵyda ashyq pikir almasý sıpatynda ótti. Kezdesýdi Bas redaktorlar klýbynyń prezıdenti Kenjebolat Joldybaı júrgizip otyrdy.
Jýrnalıstermen bolǵan eki saǵatqa jýyq aralyqta V.Bojko eldegi tehnogendik alapattardan, apattar men zilzalalardan keletin táýekelderdi meılinshe tómendete otyryp, nuqsandy azaıtýdy qamtamasyz etýdi kózdeıtin eskertýdiń jáne tótenshe jaǵdaıdy joıýdyń túbegeıli memlekettik júıesiniń qyzmeti jaıly jan-jaqty áńgimeledi. Mınıstr, sondaı-aq, jedel sheshimdi qajet etetin máselelerge toqtaldy, taıaý bolashaqta mekemeniń atqaratyn jumystarynyń basty baǵyttaryn aıtty, tehnogendik jáne tabıǵı sıpattaǵy tótenshe jaǵdaılardan qorǵaý turǵysynda turǵyndarǵa asa qajet aqparattar berýde jáne túsindirýde BAQ-tyń róliniń erekshe ekendigine nazar aýdardy.
Qorǵaýshylardyń kásibı qyzmetin zańdylyq turǵydan qamtamasyz etýdiń mańyzdylyǵy atap kórsetildi. Osy rette, mınıstr aǵymdaǵy jylǵy 26 sáýirde «Azamattyq qorǵaý týraly» Zań qabyldanǵanyn qatysýshylarǵa aıta otyryp, onyń vedomstvo quramyndaǵy qurylymdar men bólimshelerdiń qarym-qatynastarynyń sıpatyn júıeli negizde ózgertýge septigi bolǵanyn tilge tıek etti. Vladımır Bojkonyń pikirinshe, bul quqyqtyq aktini daıyndaý qajettiligi tótenshe jaǵdaı, azamattyq qorǵanys, óndiristik jáne órt qaýipsizdigi salalarynda jańa tujyrymdama qalyptastyrýǵa negizdelgen.
Kezdesýdi aıaqtaı kele, K.Joldybaı áńgimeniń Bas redaktorlar klýbynyń www.kgr.kz saıtynda jalǵasatynyn jetkizdi jáne azamattardy osy ınteraktıvti baılanysqa shyǵýǵa shaqyrdy.
«Egemen-aqparat».