Aýdan mýzeıi aýyl aralaıdy

Shyńǵyrlaý – tarıhy tereń ólke. Reseı Fede­rasııasynyń Orynbor oblysymen – ejelgi Elek jáne Tuztóbe óńirimen shek­tesip jatyr. Bul aımaq­ta talaı-talaı tarıhı oqıǵalar ótken. Ashylǵanyna ­kóp ýaqyt ótpegen Shyńǵyrlaý aýdandyq tarıhı-ólke­taný mýzeıi osynaý asyl mu­ranyń birden-bir joqshy­syna aınaldy.

Mýzeı basshysy Tilegen Qalıev osy kezge deıin «ustaǵannyń qolynda, tistegenniń aýzynda» ketken qundy jádigerlerdi jınastyryp, arheologııalyq qazba jumystaryn uıymdastyryp, ólketanýshy­lar forýmyn ótkizip, tynym tappaıdy. «Jádiger-jaýharlar» atty jańa jobanyń da maqsaty – óńir­diń ózgeshe tarıhyn eń aldymen óz turǵyndaryna tanystyrý.

– Biz osy joba arqyly aýyl aralap, mýzeı qoryndaǵy erekshe jádigerlerdi halyqqa tanystyramyz. Týǵan jerdiń tereń tarıhyna boılatyp, sol arqyly otanshyldyqty kúsheıtemiz. Eldiń shetin, shekara shebin jaılaǵan aǵaıyn úshin bul óte qajet shara. Sonymen birge osy joba arqyly halyqty mýzeı isimen tanystyryp, jeke adamdardyń qolyndaǵy qundy jádigerlermen mýzeı qoryn tolyqtyrsaq deımiz, – deıdi joba jetekshisi Tilegen Qalıev.

Shyńǵyrlaý aýdanynda 8 aýyldyq okrýg bar. Jobanyń alǵashqy kúnderinde mýzeı jádigerleri Ashysaı, Ardaq jáne Aqbulaq aýyldyq okrýgterin­de boldy. Jańa jobaǵa halyqtyń yqylasy óte jaqsy. Ashysaı aýyldyq okrýgi ortalyǵy Aman­geldi aýylyndaǵy mádenıet úıinde ótken kórmege nemerelerin ertip arnaıy kelgen kópbalaly ana Aıjan Aqaeva erekshe áser alǵanyn aıtady. Al aǵaıyndy Aqtan men Júsip Lesovtar kórmege qur qol kelmeı, mýzeıge jańa jádiger syıǵa tartty. Kóne myltyqtyń qanjar qondyrǵysy endi mýzeı tórinen oryn alatyn bolady.

Ashysaı aýylyndaǵy mádenıet úıinde de kórmeni tamashalaýshylar az bolmady. Tipti shekara shebin kúzetip júrgen sarbazdar da arnaıy kelip, tylsym syrly tarıhı buıymdardy kórip, mýzeı qyzmet­kerleriniń taǵylymdy áńgimesin tyńdaýda.

– Jobamyzǵa qoldaý bildirip, jaqsy qabyldap, kórmeni uıymdastyrýǵa kómektesken aýyl ákimderine alǵys aıtamyz, – deıdi T.Qalıev.

Batys Qazaqstan oblysy