Memleket basshysy Q.Toqaevtyń Qazaqstan halqyna Joldaýy memleketimizdiń saıası, áleýmettik jáne ekonomıkalyq jańǵyrýyna, Ádiletti Qazaqstan qurýǵa baǵyttalǵan bastamalarǵa toly boldy. Ásirese halyqtyń ál-aýqatyn jaqsartýǵa baǵyttalǵan áleýmettik máselelerge qatysty naqty bastamalar erekshe mańyzdy.
Atap aıtsaq, Úkimet densaýlyq saqtaý salasyn jáne jalpy áleýmettik salany qarjylandyrý júıesin qaıta qaraıdy; eki jylda elimizdegi 650 eldi mekende medısınalyq jáne feldsherlik-akýsherlik bólimshe salynyp, qajetti qural-jabdyqpen tolyq qamtamasyz etiledi; medısınalyq joǵary oqý oryndarynyń áleýetin paıdalaný keńeıtiledi, aldaǵy úsh jylda rezıdentýraǵa bólinetin grant sany 70 paıyzǵa kóbeıedi; balabaqshamen qamtamasyz etý máselesiniń túpkilikti sheshilýi; tárbıeshilerdiń áleýmettik mártebesiniń artyp, jalaqysy kóbeıýi, úsh aýysymmen oqıtyn mektep máselesin tolyq sheshý týraly tapsyrmalar elimizdegi áıelder men balalardyń jaǵdaıyn jaqsartýǵa baǵyttalǵan.
Eń tómengi jalaqy deńgeıin kóterý týraly, zeınetaqynyń ósýine, áıelderdiń zeınet jasyn azaıtýǵa baılanysty jáne bala kútimi merzimin uzartý týraly sheshimder de halyqtyń, eń aldymen, áıelder tabysynyń ulǵaıýyna tikeleı áser etpek. Bul máseleler Qazaqstan Prezıdentiniń janyndaǵy áıelder isteri jáne otbasylyq-demografııalyq saıasat jónindegi ulttyq komıssııanyń kún tártibinde turǵanyn, tujyrymdy talqylaýlar men sapaly usynystar aıtylǵanyn da atap ótý kerek.
Ulttyq qorǵa túsken qarajattyń ıgiligin balalarymyz tikeleı kóretini týraly bastama, jemqorlardyń zańsyz tapqan qarjysynyń memleketke ótip, túgeldeı mektep qurylysyna jumsalýǵa tıis degen Prezıdent bastamalary – elimizdiń áleýmettik ádilettilik ornatýyna baǵyt alýynyń aıshyqty kórinisi.
Áleýmettik qorǵaý júıesinde buryn-sońdy bolmaǵan, Ulttyq qordan balalar alatyn qarajat týraly bastamany aıta ketý kerek. Eń bastysy, Prezıdent tujyrymdamalyq túrde Ulttyq qordyń tabysy halyqqa tikeleı baratyn mehanızmdi usyndy.
Joldaý – Ádiletti Qazaqstandy qurýdyń ekonomıkalyq, áleýmettik jáne saıası damýynyń bolashaq júıesi, maýsymda ótken referendýmda halyq qoldaǵan konstıtýsııalyq ózgeristerdi naqty iske asyrý baǵdaryn aıqyndady.
Prezıdenttiń pikirimen aıtsaq, «Ádiletti Qazaqstandy qurý isi endi ǵana bastaldy. Aldaǵy joldyń qıyndyǵy kóp. Qol qýsyryp otyratyndar men qasaqana kedergi jasaıtyndarǵa oryn joq». О́ıtkeni qazirgideı memleketimiz úshin taǵdyrsheshti kezeńde, «múmkindikter dálizi» ashylǵan sátte árqaısysymyz bar kúsh-jigerimiz ben qýatymyzdy halqymyzdyń ál-aýqatyn jaqsartýǵa, Qazaqstannyń alǵa basýyna, adam kapıtalyn damytýǵa, jastarymyzdyń jarqyrap ósýine baǵyttalǵan reformalardyń sapaly ótýine úles qosýymyz asa mańyzdy faktorlardyń biri bolmaq.
Osy jyldyń sońyna deıin konstıtýsııalyq jańashyldyqtar negizinen zańnamaǵa engiziledi. Parlament depýtattarynyń qazirgi maqsaty Memleket basshysy qoıǵan bastamalardy zańnamalyq negizde engizýge baǵyttalyp otyr. Referendýmda qabyldanǵan qundylyqtar tıisti zańdar sheńberinde tolyqqandy qyzmet etkende ǵana qoǵamdyq qatynastardyń jańarýynyń júzege asý prosesi bastalmaq.
«Saıasatkerler aldaǵy saılaý naýqany týraly, al tulǵalar eliniń keleshegi týraly oılaıdy», degen sóz bar. Prezıdent Q.Toqaev qazaq eliniń, Qazaqstannyń aldaǵy aýqymdy kezeńdegi jańarý, jańǵyrý prosesine bastamashylyq jasap otyr, al osy bastamalardy qoldaý, júzege asyrý úshin eńbek etý árqaısysymyzǵa syn jáne jaýapkershilik.
Lázzat SÚLEIMEN,
Senat depýtaty