«Agrarlyq nesıe korporasııasy» shaǵyn nesıe berý úshin onlaın ótinimderdi qabyldaýǵa kiristi. Bul fermerlerge úıden shyqpaı-aq nesıeni aldyn ala maquldaýǵa múmkindik beredi. Korporasııanyń basym baǵytynyń biri – nesıe berý úderisin sıfrlandyrý. Bul mindetti sheshý úshin nesıe ónimderi ońtaılandyrylyp, shaǵyn nesıege ótinimderdi onlaın qaraý júıesi ázirlengen.
Júıe «Isker» baǵdarlamasy boıynsha 6 mln teńgege deıin nesıe resimdegisi keletin áleýetti klıentterge qujattar jınaý merzimin qysqartýǵa, fılıalǵa kelýdi azaıtýǵa, ótinimdi qaraý barysynyń sapasy men ashyqtyǵyn arttyrýǵa kómektesedi. Úıde otyryp-aq sharýa jeke sáıkestendirý nómiri (JSN) arqyly shaǵyn nesıe alýǵa ótinim bere alady. Avtomattandyrylǵan júıe memlekettik jáne ózge de derekqordyń málimetterin paıdalanyp, áleýetti qaryz alýshynyń tólem qabiletin tekseredi. Bul rette, kepil múlik onlaın baǵalanady.
Aldyn ala maquldaýdy alǵan kezde fermer kepil múlik jónindegi qujattarmen birge korporasııanyń fılıalyna barady. Eger qandaı da bir sebeppen klıent aldyn ala maquldaýdy almasa (bank nemese basqa qarjy ınstıtýty aldyndaǵy merzimi ótken bereshek, salyq, teris nesıe tarıhy jáne t.b.), fılıalǵa barýdyń qajeti joq.
«Agrarlyq nesıe korporasııasy» AQ basqarma tóraǵasynyń orynbasary Rýslan Tólegenovtiń aıtýynsha, bıznes úderisti ońtaılandyrý – korporasııa qyzmetiniń mańyzdy baǵytynyń biri. О́tinimdi qaraýdyń elektrondy formaty adamı faktordy azaıtady. Sonymen qatar qajetti qujattar sany da kemıdi. Onlaın nesıege ótinim berý fermerdiń 10 mınýttan artyq ýaqytyn almaıdy.
«Nesıeni aldyn ala onlaın maquldaý týraly ótinish berý úshin ne isteý kerek? Eger mal sharýashylyǵy nemese eginshilikti damytýǵa qarjy alǵyńyz kelse, agronesie.kz platformasyna kirip, ámbebap kelisimge qol qoıyńyz. О́tinimdi jeke kabınet arqyly joldańyz. Kepil berýshiniń derekterin engizińiz (JSN jáne telefon nómiri) jáne múlikti aldyn ala onlaın baǵalatyńyz. Usynylǵan kepil jetkilikti bolǵan jaǵdaıda júıe qaryzdy aldyn ala maquldaý týraly habarlama jiberip, Agrarlyq nesıe korporasııasynyń oblystyq fılıalyna júginýge qajet qajetti qujattardyń tizbesin joldaıdy», delingen korporasııanyń resmı habarlamasynda.
Elimizde «Iskerden» bólek fermerlerge tıimdi sharttarmen nesıe usynatyn «Keń dala» (jyldyq tıimdi syıaqy mólsherlemesi 1,5 paıyzdan bastalady) jáne «AgroBıznes» (1 mln teńgeden 5 mlrd teńgege deıin beredi) baǵdarlamalary da bar.
Buǵan deıin elimizde fermerlerge aýyl sharýashylyǵy tehnıkalaryn jeńildetilgen lızıngpen berý baǵdarlamasy iske qosylǵan edi. Ol úshin «Jasyl Damý» AQ esebinen – 30 mlrd, «QazAgroFınans» AQ esebinen 10 mlrd teńge qarastyrylǵan. Qazirge deıin baǵdarlama aıasynda myńnan astam ótinim tirkelip, sonyń 369-y 16,6 mlrd teńge somasyna qarjylandyrylǵan. Jalpy, qazaqstandyq fermerler jalpy quny 43,6 mlrd teńge bolatyn 1 089 aýyl sharýashylyǵy tehnıka birligin alýǵa nıetti. Biraq baǵdarlamaǵa bólingeni – 40 mlrd teńge. Suranystyń bul somadan asyp ketkenin eskerip, memleket aldaǵy ýaqytta qarjylandyrý kólemin ulǵaıtýy da bek múmkin.