Qasym-Jomart Toqaevtyń mańyzdy tapsyrmalarynyń biri – aýyldyq jerlerdegi medısınalyq kómektiń sapasyn arttyrýǵa baǵyttalǵan densaýlyq saqtaý salasyn jańǵyrtý.
Prezıdenttiń aıtýynsha, 32 aýdandyq aýrýhanany kópsalaly medısınalyq mekemeler deńgeıine deıin jańǵyrtý josparlanýda. «Nátıjesinde jedel jáne orta tehnologııalyq medısınalyq kómek alý múmkindigi 500-den 200 shaqyrymǵa deıin qysqarady. Úkimet bıýdjettik prosestiń bir bóligi retinde bıyl qyrkúıek aıyna deıin osy ulttyq jobalardy júzege asyrý úshin barlyq esepteýdi jasap, qajetti sharalardy qabyldaýy kerek», dep tapsyrdy Q.Toqaev. Densaýlyq saqtaýdy damytýdyń memlekettik baǵdarlamasynyń negizgi baǵyttarynyń biri – aýyl turǵyndaryna medısınalyq qyzmet kórsetýdiń sapasy men qoljetimdigin arttyrý.
Aýyl turǵyndarynyń jalpy sanynyń 60 paıyzyn quraıtyn Jambyl oblysynda «aýyldyq aımaqtyń densaýlyq saqtaý salasyn damytý» – jergilikti atqarýshy organdardyń basty mindetteriniń biri. Medısınalyq mekemelerdiń materıaldyq-tehnıkalyq bazasyn nyǵaıtý da mańyzdy másele retinde qarastyrylady.
Bıyl 23 nysannyń qurylysy bastaldy, onyń 22-si aýyldyq jerlerde (Baızaq aýdanynyń ortalyq aýdandyq aýrýhanasy, dárigerlik ambýlatorııa, Shý aýdanyndaǵy ońaltý ortalyǵy), Merki, Jambyl aýdandaryndaǵy ozat tájirıbe ortalyqtary, sondaı-aq Talas aýdanynda 9 medısınalyq mekeme kúrdeli jóndeýden ótti. Jambyl oblysynda aldaǵy 3 jylda aýyldyq jerlerde taǵy 46 densaýlyq saqtaý nysanyn salý josparlanýda.
2023 jyly Talas, Merke, Shý aýdandarynda aýdanaralyq aýrýhanalar ashý úshin jobalyq-smetalyq qujattar ázirlenýde. Sonymen qatar Shý jáne Qordaı aýdandarynda «Úzdik tájirıbe» ortalyqtary ashylady.
Shalǵaıdaǵy eldi mekenderdiń aýyl turǵyndaryn qoljetimdi profılaktıkalyq, dıagnostıkalyq jáne konsýltatıvtik kómekpen qamtamasyz etý úshin 11 jyljymaly mobıldi pýnkt jumys isteıdi. Olardyń barlyǵy qajetti medısınalyq kómektiń qoljetimdiligi men óz ýaqytynda qamtamasyz etýge, halyqtyń qanaǵattanýyna baǵyttalǵan. Bul sharanyń barlyǵy túptep kelgende, halyqtyń densaýlyǵynyń jaqsarýyna, ómir súrý uzaqtyǵynyń artýyna ákeledi.
Oblysymyzdyń medısına qaýymy Prezıdenttiń baǵyt-baǵdaryn qoldap, halyqtyń densaýlyǵyn jaqsartý baǵytyndaǵy bastamalaryn jalǵastyrady. Aýyl – halqymyzdyń besigi. Al aýyl turǵyndarynyń densaýlyǵyn saqtaý biz úshin kezek kúttirmeıtin basty mindet bolyp qala beredi.
Áset QALIEV,
Jambyl oblysy ákimdigi densaýlyq saqtaý basqarmasynyń basshysy