Qytaıdyń Shanhaı qalasynda «Qazaqstan-2050» Jalpyulttyq qozǵalysynyń uıymdastyrýymen Qytaıda turatyn Qazaqstan jastary uıymdary kóshbasshylarynyń sleti ótti. Jıynǵa Beıjiń, Shanhaı, Sıan, Ýhan jáne Úrimshi qalalarynan kelgen stýdenttik uıymdardyń jetekshileri men Qytaıdaǵy qazaq dıasporasynyń jastar ókilderi qatysty. Shamamen 500-ge jýyq delegat Qytaıdyń ár qıyrynan kelip, qazaq jastary jat jurtta júrse de birliginen aınymaıtynyn taǵy da bir baıqatty.
Shara aıasynda «Qazaqstan-2050» Strategııasynyń mańyzy arnaıy uıymdastyrylǵan konferensııada talqylandy. Basqosý Qytaıdaǵy Qazaqstan elshiligi men Qytaıdaǵy Qazaqstan stýdentteri qoǵamdastyǵynyń qoldaýymen ótti.
– Búgingi tańda Qytaıda 1,5 mln. qazaq turady. Bul – eń iri qazaq dıasporasy. Buǵan qosa, Qytaıdaǵy joǵary oqý oryndarynda júzdegen qazaqstandyqtar oqyp jatyr. Erteńgi kúni dál osy azamattar Qazaqstan men Qytaı arasyn jalǵap, el men eldi baılanystyratyn dáneker bolady. Iаǵnı, bizdiń bıznes úshin, jalpy barlyǵymyz úshin, demek, elimizdi eń damyǵan 30 eldiń qataryna engizý jolynda sizderdiń kómekterińiz zor bolmaq. Shanhaıda biz osy máselelerdi talqylaý úshin jınalatyn bolamyz. Dál qazir bizdiń «Qazaqstan-2050» Strategııasyn júzege asyrýǵa bar kúshimizdi salýymyz mańyzdy, –deıdi qozǵalys kóshbasshysy Danat Jýmın.
Qytaıdaǵy qozǵalys belsendileri Tilektes Adambekov pen Oljas Súleımenov sharanyń maqsaty «shetelde bilim alyp jatqan jastardyń Otanǵa degen patrıottyq sezimin nyǵaıtý, memlekettik tildi nasıhattaý, «Qazaqstan – 2050» Strategııasynyń júzege asyrylý jolyndaǵy jastardyń mańyzdylyǵyn túsindirý» ekenin aıtady.
Kezdesýden bólek, shara aıasynda Qytaıdyń ár qalasynan kelgen kóńildi tapqyrlar klýbynyń oıyndary ótedi. Oǵan Qazaqstannan «Jaıdarman» komandasynyń qatysýy da josparlanyp otyr. Al osy jerde aıta ketetin jaıt – «Qazaqstan-2050» jalpyulttyq qozǵalysy 2013 jyldyń 6 jeltoqsanynda bir top kóshbasshy jastardyń yntasymen qurylǵan edi.
«Egemen-aqparat».