Uly Otan soǵysy bastalyp, elge zulmat kezeń kelgende 6 jasar, mekteptiń bastaýysh synybyna daıyndalyp júrgen bala bolatynmyn. Jastary áskerge alýǵa jatatyn áke-aǵalardyń birqatary attandyrylyp, elge olardan úshburyshty hattar da kele bastady, urysqa bara sala oqqa ushyp arttaryn qara jamyldyrǵan bozdaqtar da kóp edi.
Belimiz qataımastan úlkenderdiń tirligine aralasyp, qolymyzdan kelgen kómekterimizdi biz sııaqty jas balalar da kórsete bastadyq.Uly Otan soǵysy aıaqtalyp, nemis basqynshylaryn óz astanasy Berlınde talqandaǵannan keıin elge áskerlerimiz jeńispen oralyp jatty. 4-5 ret jaralansa da sol Berlınge deıin baryp, elge qaıtýǵa násip etkenderdiń biri meniń nemere aǵam Aıtjanov Sıǵabat bolatyn. Halqymyzda «40 jyl qyrǵyn bolsa da ajaldy óledi», degen sóz bar ǵoı, sol sóz osy aǵaǵa arnalǵan ba dep qalasyń.
Bul kisi oryssha, qazaqsha, tipti, arabshany da taza sóıleıtin, qazirgi dárejedegideı orta nemese joǵary oqý oryndaryn bitirmegenimen, dúnıetanymy mol, úlken-kishiniń sózin taýyp sóıleı biletin, quımaqulaq shejireshiligi de bar, uıymdastyrý qabileti de óte joǵary adam bolatyn.Osy qasıetterine baılanysty bolýy kerek, ol kisini Gýrev otyn daıyndaý mekemesine bir basshylyq qyzmetke tartty.Ol bir soǵystan turalaǵan sharýashylyqty jolǵa qoıý, oǵan qosa, eki úıdiń biri qara jamylyp qara qaǵaz alǵan, qaıǵy-derttiń orny jazylmaǵan qıyndaý kezeń edi ǵoı.Sol kezde eldi alǵa bastaý degenińiz, ekinshi maıdanmen para-par bolatyn. Gýrev-Oral toǵaılarynan daıyndalǵan aǵashty jınap, keptirip, odan ony Jaıyq ózeni boıymen barja súıregen saýsaqpen sanarlyq parohodtarmen qalaǵa tasytý degen ońaı sharýa emestin. Qazirgideı kógildir otyn túgil kómirdiń ózi qat kezde jylylyqqa talpynbaǵan keıbir otbasynyń sýyqtan ólip ketkenderi kezdesken. Aǵamyzdyń Otan soǵysynda alǵan kontýzııaǵa baılanysty shashtary túsip qalǵan mańdaıynyń shyp-shyp terlep, keıbir túnderdi uıqysyz ótkizgendigin kózimiz kórgen.
Mine, Uly Otan soǵysynda er atanyp, keýdesin orden-medaldarǵa toltyryp kelgen aǵamyzdyń beıbit jaǵdaıdaǵy týyndaǵan qıyn-qystaý kezeńderdi jeńe bilý qasıetteri bizge úlgi boldy. Osyndaı elge tirek bolǵan aǵalar esimderi umytylmaýy tıis.
Saıdesh ESMUHANOV,
eńbek ardageri, Eńbek Qyzyl Tý, «Qurmet Belgisi» ordenderiniń ıegeri.
Atyraý oblysy.