Qazaqstanda jańa elektoraldyq kezeń bastaldy. Referendýmnan keıin eldiń birqatar sarapshylary konstıtýsııalyq reformanyń barysy prezıdenttik jáne parlamenttik saılaý ótkizý qajettiligin bildiredi degen edi.
Sarapshylar referendým nátıjelerin bekitý maqsatynda prezıdenttik, parlamenttik jáne máslıhattyq mandattardy jańartý mańyzdy ekenin de atap ótti. Sondyqtan sarapshylar qoǵamdastyǵy úshin de, saıası toptar úshin de saılaý boljamdy qadam boldy.
Aldaǵy kezekten tys prezıdent saılaýyn osy ýaqytqa deıin elimizde qabyldanǵan saıası reformalardy júzege asyrýdyń tetigi dep aıtýymyzǵa tolyq negiz bar. О́ıtkeni azamattar saılaýǵa qatysý arqyly elimizdiń saıası jańǵyrýyna, jańa demokratııalyq modelge kóshýine qoldaý bildiredi.
Saılaý saıası prosess retinde birqatar mańyzdy fýnksııany atqarady. Birinshiden, saılaý bılik organdaryn qalyptastyrýdyń demokratııalyq tásili retinde saıası rejim men senimdi zańdastyrýdyń quraly ǵana emes, sonymen qatar azamattardyń saıası belsendilik tanytýynyń, olardyń suranystaryn, múddelerin, qoǵamdyq shoǵyrlanýyn, bıliktiń azamattarmen keri baılanysyn qamtamasyz etýdiń jáne saıası mádenıetti qalyptastyrý men damytýdyń, saıası ómirge qatysý daǵdylaryn ıgerýdiń mańyzdy quraly.
Ekinshiden, saılaý – azamattardy tolǵandyratyn suraqtar men máselelerdi sheshýdiń jańa maqsattary men baǵdarlamalaryn usynýdyń, jalpy áleýmettik-ekonomıkalyq, saıası baǵytty ornyqtyrý tásili. Sondyqtan aldaǵy saılaý halyqty biriktirýge baǵyttalǵan. Jalpy álemdik trendterdi nazarǵa alatyn bolsaq, azamattarǵa aldaǵy joldyń baǵdary men naqty josparlardy aıqyn túsiný qajet. Saılaý konstıtýsııalyq reformalardyń jetistikterin bekitip qana qoımaı, basqa salalardaǵy reformalardy jalǵastyrý men kúsheıtý úshin qajetti ýaqyt pen senim mandatyn beredi. Eń birinshi kezekte áleýmettik jáne ekonomıkalyq salalarda.
Jalpy saılaý qoǵamdyq ómirge belgili bir sıkldik sıpat berip, júrip ótken joldy qorytyndylap, bolashaqqa nazar aýdarýǵa múmkindik jasaıdy.
Alýa JOLDYBALINA,
Prezıdent janyndaǵy QSZI
dırektorynyń orynbasary