Elimiz qazir jańasha baǵytta Ádiletti Qazaqstan qurý jolyndaǵy áleýmettik-saıası reformalardy qolǵa aldy. Memleket basshysy Qasym-Jomart Toqaevtyń bul bastamalary halyqtyń qoldaýyna ıe boldy. Jyl basyndaǵy Konstıtýsııamyzǵa ózgerister engizý jónindegi referendým, Prezıdenttiń jeti jylǵa jáne bir merzimge saılanýy týraly ózgeristeri de oı saldy. Aldaǵy ýaqytta, atap aıtqanda, 20 qarashada ótetin kezekten tys Prezıdent saılaýy – osy úlken ózgeristerdiń zańdy jalǵasy.
Qoǵamdy demokratııalandyrýǵa baǵyttalǵan aýqymdy is-sharalardyń yqpalyn qazaqstandyqtar qazirdiń ózinde aıqyn ańǵaryp otyr. Saıası partııalardy tirkeýdiń ońtaılanýy, partııalyq tizimmen qosa majorıtarlyq negizde jekelegen adamdardyń ózin-ózi usyný múmkindigi, saılaýdyń ádiletti ótýi sanany serpiltetin basty qadam bolsa kerek.
Qoǵamdaǵy «Prezıdent saılaýyna daıyndyqqa az ýaqyt berilip otyr. Saıası partııalar úgit-nasıhat jumystaryn jolǵa qoıyp úlgermeıdi» degen synı pikirler negizdi deı almaımyz. Álemdik tájirıbege súıener bolsaq, eki aı bul naýqan úshin jetkilikti kezeń ekenin kóremiz. Qazirdiń ózinde jańa partııalardyń tirkelýine, óz kandıdattaryn tańdaýyna jaǵdaı týǵyzyldy. Úmitkerlerdiń qatarynda jeke tulǵalar da barshylyq.
Prezıdent saılaýyna baılanysty Qasym-Jomart Kemeluly Qazaqstan halqyna úndeý jarııalap, jaǵdaıdy tolyqtaı túsindirip berdi. Kezekten tys saılaý – jekelegen toptyń nemese adamnyń múddesi úshin emes, elimizdegi bastalǵan oń ózgerister men Ádiletti Qazaqstandy qurý úshin asa qajetti sheshim deýimiz de sondyqtan. Endeshe, elimizdiń jarqyn bolashaǵy úshin osy bastamalarǵa qoldaý kórsetip, reformalardyń júıeli júzege asýyna úlesimizdi qosaıyq.
Janbolat JО́RGENBAEV,
Senat depýtaty