Japon fılosofııasynda «О́zgeristi ózińnen basta» degen qaǵıda bar. Memleket basshysy Q.Toqaev osy qaǵıdany berik ustanyp otyr. Elge jetekshilik etetin basshynyń óz týystaryn bılikke tartpaý, Prezıdent mandatyn bir márte ǵana jeti jylǵa belgileý, elge ádiletti, adal qyzmet etý, jemqorlyqqa qoǵam bolyp qarsy turýǵa úndeý – Joldaýda kópshiliktiń kókeıine qonǵan qaǵıdattardyń birsypyrasy osylar.
Elimizde kezekten tys Prezıdent saılaýy ótetin kún belgili boldy. Alda úlken ózgerister kútip tur. Prezıdent saılaýynan keıin Parlament, jergilikti máslıhat saılaýlary da, Úkimet quramyn qaıta jasaqtaý sekildi aýqymdy sharalar kún tártibinde tur. Memleket basshysy halyqqa jasaǵan úndeýinde osynyń bári demokratııa jolymen, ádil saılaý arqyly júzege asyrylatynyn aıtty.
Qarapaıym halyq adaldyqty, ádildikti arman etedi. Patshalardyń qara qyldy qaq jarǵan ádiletti, týrashyl bolǵanyn qalaıdy. Memleket basshysyn nege halyq bolyp saılaıdy? О́ıtkeni sol halyqtan aqyldy, bilimdi, kózqarasy berik, talaby myqty adamdy tańdap alǵysy keledi. Solaı bolýy kerek te. Sonda ǵana prezıdentter halyqtyń ıgiligin oılaıdy.
El ishinde «Eski kadrlarmen Jańa Qazaqstandy qalaı quramyz?» degen oılar aıtylyp júr. Oryndy pikir. Sóıtse de eskiniń bárin bir sátte sypyryp tastap, túgel jańalaıyn dep otyrǵan eshkim joq. Halyq arasynda tájirıbeli, oıly, halyqqa shyn janashyr, memleket múddesin oılaıtyn, adal qyzmet etetin, ádiletti jolmen bılikke kele alatyn azamattar barshylyq.
Osy joly halyq Prezıdent saılaýynda úlken belsendilik tanytady dep senemin. Jurtshylyq budan bylaı Prezıdentti eki ret saılaýǵa jol bermeıdi. Bul norma Konstıtýsııada anyq aıtylǵan. Endi jańa saıası partııalar belsendi shyǵa bastaıdy. Bul degenińiz, aldaǵy ýaqytta bir-birimen básekelese alatyn saıası uıymdar óz kandıdattarynyń arasynan myqty tulǵalardy alǵa tartady degen sóz. Ata Zańǵa sáıkes Prezıdent bir ret qana saılanatyn bolsa, eskige, ádiletsizdikke jol berilmeıdi. Demek aldaǵy jeti jylda Qazaqstanda úlken ózgerister bolady.
Prezıdent saılaýyna ózin-ózi usynatyn, tipti partııada joq azamattar da saılaýǵa túse alady. Ol múmkin, depýtat, mınıstr, qoǵam qaıratkeri de, tipti qarapaıym, oıy bar azamat ta bolýy múmkin. Menińshe, Prezıdent memlekettik tildi jetik meńgergen, eldiń damýyna, memlekettiń qaýipsizdigine, Qazaqstan halqyna ádil de adal, jan-tánimen qyzmet etýge daıyn azamat bolýǵa tıis.
Prezıdent saılaýy – elimizdegi eń basty saıası oqıǵa. Bul saılaýǵa kez kelgen oppozısııalyq kúshter de qatysady. Bul naǵyz demokratııalyq kórinis. Árbir saıası partııa kúreske daıyn bolýǵa tıis. «Eldiń búkil saıası júıesin túbegeıli ózgertemiz», dedi Q.Toqaev. Demek búkil quram jańarady. Senim mandaty halyq senimine jumys isteıdi. Osydan baryp halyq senetin bılik, áleýmettik ádilettilik qalyptasýy kerek. Ekonomıkalyq saıasat durys bolsa, ol eldiń damýyn jańa satyǵa kóteredi.
Myqty básekeles bola alatyn, saılaýaldy baǵdarlamalary ótimdi, senimdi úmitker ǵana halyqtan qoldaý tabady. Halyq ádil saılaýdy kútedi.
Saıasat BEIISBAI,
Fılosofııa, saıasattaný jáne dintaný ınstıtýtynyń bas sarapshysy