Keıingi jyldary Túrkistanǵa tartylǵan ınvestısııa kólemi 8 ese artqan. 77 myń adamǵa arnalǵan kópqabatty úıler salyndy. Sonymen qatar shahar jasyl jelekke oranyp, ekologııalyq ahýaly jaqsarǵan. Turǵyndardy aýyz sýmen jáne tabıǵı gazben qamtamasyz etý máselesi sheshildi dep aıtýǵa bolady.
Memleket basshysy Qasym-Jomart Toqaev Túrkistan óńiri jurtshylyǵymen kezdesýinde jumys saparynyń negizgi maqsaty oblystaǵy ahýalmen tanysý ekenin aıtyp, osyndaı derekterdi keltirdi. Iá, 2019 jyldan beri oblysqa 2 mıllıonǵa jýyq týrıst kelgen. Keıingi úsh jylda aımaqtaǵy ónerkásip jáne aýyl sharýashylyǵy salasy 1,5 ese ósken. Oblysta 64 myńǵa jýyq turaqty jumys orny ashyldy. Sondaı-aq Túrkistan oblysynda ekonomıkanyń negizgi kórsetkishi – jalpy óńirlik ónerkásip óniminiń kólemi bıylǵy 8 aıda 534 mlrd teńgeni qurap, ótken jyldyń tıisti kezeńimen salystyrǵanda 125 mlrd teńgege ósken. О́ńirdiń ónerkásip áleýetin damytý maqsatynda jalpy quny 12 mlrd 700 mln teńgege 26 ınvestısııalyq joba iske qosylyp, 936 jumys orny ashyldy. Oblys úshin mańyzdy iri jobalardy iske asyrý josparlanyp otyr. Atap aıtqanda, kaýstıkalyq soda, PVH, karbıd kalsıı, sement óndiretin, 5 klasty motor maıy men munaı ónimderin óndiretin jáne fosforıt óńdeý zaýyty iske qosylady. Bul jumystar memlekettik qoldaý nátıjesinde júzege asyrylyp otyr.
О́ńir jurtshylyǵymen kezdesýinde Prezıdent Túrkistandy atajurtymyzdyń altyn qazyǵy dep atap ótti. «Túrkistan – bárimizdiń maqtanyshymyz, eki dúnıe esigi, er túriktiń besigi atanǵan búkil álemge tanymal qasıetti jer. Osy kıeli shahardyń tól tarıhymyzda aıryqsha orny bar. Túrkistan tórindegi Qoja Ahmet Iаsaýı kesenesi – rýhanııatymyzdyń myzǵymas dińgegi. Sondyqtan Túrkistanǵa jalpy, osy oblysqa erekshe mán berýimiz kerek. Bul eń aldymen, Úkimetimizdiń basty mindeti», dedi Prezıdent.
Memleket basshysynyń ár saparynan jaǵymdy jańalyq, oń ózgeris kútetin jurtshylyq qasterli mekenge bas ıip, ata-babadan kele jatqan amanatqa degen qurmetin de joǵary baǵalap otyr. Eń áýeli qazaqtyń ilgeride dúnıeden ótken ıgi jaqsylarynyń jambasy tıgen Qoja Ahmet Iаsaýı kesenesine zııarat etken ónegeli qadamynda da tereń maǵyna jatyr.
Qaırat BALABIEV,
Túrkistan oblystyq máslıhatynyń hatshysy