Memleket basshysy Qasym-Jomart Kemeluly Toqaev 2022 jyldyń 20 qarashasynda Qazaqstan Respýblıkasy Prezıdentiniń kezekten tys saılaýyn taǵaıyndaý týraly Jarlyqqa qol qoıdy. Bul mańyzdy qadam jurtshylyqtyń jarqyn bolashaqqa degen senimin arttyra túskeni anyq.
Aldaǵy saılaýda jeńiske jetken kandıdat eldi jeti jyl basqarady jáne ol eń joǵary laýazymdy qyzmetti bir-aq merzim atqarady, qaıta saılana almaıdy. Bul norma Ata Zańymyzben tolyqtaı bekitildi.
Atalǵan qadam – elimizdiń demokratııalyq qundylyqtarǵa bet burýynyń basty kórinisteriniń biri jáne bul álemdik tájirıbede de kezdesedi. Máselen, Izraıl, Italııa, Irlandııa sekildi memleketterde mundaı tájirıbe burynnan bar.
Shyny kerek, elimiz úlken ózgeristerdiń aldynda tur. Ol úderister bastalyp ta ketti. Al Prezıdenttiń osy sheshimi ózgeristerdiń naqty demokratııalyq baǵytta órbip jatqanyn anyq kórsetedi.
El Prezıdenti Joldaý barysynda shıkizattyq óndiristen ónerkásiptik óndiriske bet burý, naqty sektordy damytý, áleýmettik salaǵa basa mán berý, azamattardy barynsha ónimdi jumyspen qamtý, kásipkerlikti qoldaý sekildi memlekettik saıasattyń basym baǵyttaryn aıqyndady. Osy jáne ózge de mańyzdy salalar saılaýdan keıingi elimizdiń ekonomıkalyq-áleýmettik damýynyń basty baǵyttaryna aınalady degen senim mol. Memleket basshysy halyqqa joldaǵan úndeýinde saılaýdyń qatań túrde zańǵa sáıkes sheteldik, otandyq baıqaýshylardyń qatysýymen ádil ári ashyq ótetinin shegelep aıtty. Ádiletti Qazaqstanǵa qadam basqanymyzdy sezinetin kún alys emes.
Mán berip qaraıtyn bolsaq, Prezıdenttiń aıtyp otyrǵan oılary qanshalyqty ózekti ekenin uǵyný qıyn emes. Ekonomıkalyq syn-qaterler sát sanap artyp keledi. Osy oraıda elimizde júrgizilip jatqan áleýmettik-saıası, ekonomıkalyq reformalar transformasııasynyń sabaqtastyqpen jalǵasyn tabýy óte mańyzdy.
Búginge deıin júrgizilgen reformalardyń saýatty jalǵasyn tabýy úshin Ádiletti Qazaqstan jaǵdaıynda Prezıdentke halyqtyń senimi kerek. Sondyqtan aldymyzda ótetin kezekten tys Prezıdent saılaýynyń tek saıası ǵana emes, el arasyndaǵy birlikti, ulttyq úndestikti nyǵaıtý jolynda rýhanı astary da bar.
Bul sózimizge dáıek bolsyn, Memleket basshysy Túrkistan oblysyna sapary kezinde memlekettigimizdi saqtap, ósip-órkendeýimiz úshin el birligi aýadaı qajet ekenin, al beıbitshiliktiń, tynyshtyq pen turaqtylyqtyń kepili birlikte ekenin, álemdegi bolyp jatqan shıelenisterge qatysty elimizdiń múddesi halyqaralyq uıymdardyń ustanymdarymen ushtasatynyn, kúrdeli jaǵdaıda biz úshin eń basty kúsh – birlik, parasattylyq jáne tózimdilik ekenin basa aıtqan bolatyn.
Biz bir dúnıeni qaperden shyǵarmasaq deımin. Qandaı da bir reforma bir kúndik dúnıe emes. Aýyl men aýyldyń arasyn jalǵaıtyn joldy ózgertýdiń ózi orasan jumysty talap etedi. Al eldiń jańa baǵytyn aıqyndaý qanshama jumys, qaırat pen ýaqytty talap etetinin ózińiz saraptap, ańdap kórińiz. Bastysy, biz jańa baǵytymyzdy tańdadyq. Ádiletti Qazaqstan qurý jolynda talaı syn kezdesetini sózsiz. Biraq men osy baǵytty abyroıly atqaryp ótetinimizge senemin.
Ádiletti memleket, birtutas ult, berekeli qoǵam qurýdy maqsat etken Memleket basshysynyń demokratııalyq qoǵamǵa jol bastaıtyn bastamalaryn qoldaı otyryp, onyń elimizdiń ómirine etene enýine barshamyz bir aýyzdan atsalysýymyz qajet dep esepteımin.
Narıman TО́REǴALIEV,
Senat depýtaty