Bar úmit – Býblıkte

Astanadaǵy Ulttyq tennıs ortalyǵynda ornalasqan Beeline Arena sport kesheninde ótip jatqan básekeniń ekinshi kúninde jarys jolyna Qazaqstannyń birinshi, álemniń 43-raketkasy Aleksandr Býblık shyǵyp, Astana Open ATP 500 týrnıriniń ekinshi aınalymyna joldama aldy.

О́z jankúıerleriniń aldynda óner kórsetken jerlesimiz alǵashqy kezeńde álemniń 54-ra­ketkasy nıderlandtyq Tallon Grıkspýrmen sheberlik baıqasty. Jalpy, keshegi oıyn­ǵa deıin qarsylastar bir-biri­men ózara eki ret kezdesip, eke­ýinde de Býblıktiń asyǵy al­shy­synan túsken edi. Bul jo­ly da Aleksandrdyń baǵy jan­­dy. Astanadaǵy matchtyń birin­shi partııasynda Býblık qar­sylasyna birde-bir set ber­meı, 6:0 esebimen jeńiske jet­ti. Birinshi kezeń nebári 21 mı­nýt­qa sozyldy. Ekinshi sette T.Grıkspýr qateliksiz oınap, tarazy basyn ózine aýdardy – 6:4. Aleksandr alǵashqy settegi jeńisinen keıin erkinsip ket­ti me, áıteýir bul partııada breık-poınttaryn utymdy paıdalana almady. Esesine ondaı múmkindikterdi qarsylasy múlt jibergen joq.

Úshinshi, sheshýshi partııada esep 2:1 bolǵan mezette qa­zaqstandyq tennısshi breık jasap, keıinnen óz geıminde de jeńiske jetti – 4:1. Altynshy geımde de taǵy bir breık jasap, 5:1 esebimen partııany aıaqtaýǵa jaqyn turǵan edi. Biraq keıingi eki geımde Grıkspýr de breık jasap, esep aıyrmasyn qysqartty – 5:3. Degenmen Aleksandr dopty oıynǵa qosqan óz geımin sátti aıaqtap, 6:3 ese­bi­men jeńiske jetti. Bir saǵat 40 mınýtqa jal­ǵasqan básekede A.Býblık 15 eıs jasap, 9 breık-poınttyń beseýin paıdalandy.

Býblık búgin ekinshi aınalymda álemniń 10-shy, osy jarystyń 7-raketkasy Polsha ókili Hý­bert Hýrkachpen kezde­sedi. Ol birinshi kezeńde ar­gen­tınalyq Fransısko Cherýn­dolony (29) eki sette – 6:2, 7:6 esebimen tize búk­tirgen bolatyn.

Sondaı-aq álemniń tórtinshi raketkasy reseılik Danııl Med­vedev te ekinshi aınalymǵa joldama aldy. Ol tusaýkeser kezdesýinde álemdik reıtıngte 40-orynda turǵan ıspanııalyq Albert Ramosty eki sette – 6:3, 6:1 esebimen esh qınalmaı ut­ty. Medvedev ekinshi ke­zeń­de fınlıandııalyq Emıl Rýýsý­vý­orımen (53) oınaıdy. Sony­men qatar horvatııalyq Ma­rın Chılıch te jarysty sátti bas­tady. Ol germanııalyq Oskar Otteni úsh sette – 7:5, 6:7, 6:2 ese­bimen sú­rindirdi.

Al álemniń onynshy raketkasy Andreı Rýblıov ekinshi aınalymda qytaılyq Chjıchjen Chjandy utyp (6:3, 6:2), alǵash­qylardyń biri bolyp ATP 500 Astana Open týrnıriniń shırek fınalyna shyqty.

Juptyq synda baq synaǵan qazaqstandyqtar Andreı Golý­bev pen Aleksandr Nedo­vesov birinshi aınalymda fran­sııa­lyqtar Adrıan Mannarıno men Fabrıs Martenge jol berdi – 6:3, 4:6, 9:11. Osylaısha, Astana do­da­syn­da Qazaqstannan tek A.Býb­lık qana qaldy.