Sońǵy jyldary elimizde kóptegen tyń bastama, naqty usynystar ortaǵa tastalyp jatyr. Munyń bári Ádiletti Qazaqstan qurý baǵytyndaǵy reformany aıǵaqtaıdy. Memleket basshysy 1 qyrkúıektegi Qazaqstan halqyna Joldaýynda saıası reformalardyń jalǵasy retinde bıyl Prezıdent saılaýyn, kelesi jyly Parlament saılaýyn kezekten tys ótkizý týraly usynys jasady.
Prezıdent saılaýdyń qatań túrde zańǵa sáıkes ótetindigine kepildik beretinin jáne saılaýdyń sheteldik, otandyq baıqaýshylardyń qatysýymen ádil ári ashyq ótetinin qadap turyp aıtty. Qazaqstan saıası jańǵyrýmen qatar áleýmettik-ekonomıkalyq baǵytta oń ózgerister oryn alyp, onyń ıgiligin bar halyq kóretinine senimdimin.
Asa manyzdy reforma retinde Prezıdenttiń bir ǵana merzimge saılanýy usynyldy. Jeti jyl merzim rasynda da barlyq oıǵa alǵan máselelerdi, saılaýaldy baǵdarlamalardy iske asyrýǵa tolyqtaı jetetin ýaqyt. Bul – tyń bastama. Ashyq demokratııalyq jol.
Qazaqstannyń ózindik orny bar, baǵyty aıqyn, maqsaty anyq. Memlekettiń, ulttyń aldynda turǵan maqsat-múddeler ózgermeıdi. Ol – ata-babadan qalǵan jerdi saqtaý, eldi qorǵaý, eldiń azamattarynyń ósip-ónýine, básekege qabiletti bolýyna jaǵdaı jasaý, ıaǵnı ekonomıkalyq órkendeý, áleýmettik jańǵyrý, ashyq, ádiletti qoǵam qurý. Sondyqtan bul reforma demokratııa jolyndaǵy batyl qadam. Táýekelge bel býsaq ta, osyndaı sheshim halqymyzdyń jarqyn bolashaǵy úshin kerek dep kámil senemin. «Bul reforma ne úshin jasalmaq?», degen suraq paıda bolýy múmkin. Másele mynada: Prezıdenttik laýazymǵa kóp jyl boıy bir ǵana adam ıe bolmaýy kerek. Álemde bolsyn, bizdiń elimizde bolsyn kóp jyl boıy bir ǵana adam eń joǵary laýazymǵa ıe bolsa, mundaı jaǵdaı elge de, Memleket basshysyna da abyroı ákelmeıdi. Elimiz bolashaqqa nyq senimmen qarap, adal, daryndy saıasatkerlerge jol ashylǵanyn qalaıdy. Jalpy, jurt bizdiń saıası júıeni ózgertý týraly bastamalardyń mán-mańyzyn jaqsy túsinip otyr. Osy jumystardy odan ári jalǵastyrý úshin jańa Konstıtýsııaǵa saı prezıdent saılaýyn ótkizip, memleket basshysyna mandat berýimiz kerek.
Bul – Qazaqstan jańarýynyń basy, barshamyzdyń qatysýymen oryndalatyn úlken kúrdeli úderis. Ol úshin Úkimet halyqtyń ál-qýatyn arttyrýǵa, áleýmettik jaǵdaıyn kóterýge, erteńgi kúnine, balalarynyń bolashaǵyna alańdamaıtyndaı jaǵdaı qalyptastyrýy qajet. Adal eńbegimen ıgilikke jetkisi keletin árbir azamatqa múmkindik berý úshin atqarylar jumystar shash-etekten. Muny júzege asyrý úshin úlken kúsh-jiger, ult birligi qajet. Saıası naýqan zańǵa sáıkes, ádil jáne ashyq ótetinine senemiz. Qazaqstandyqtar saılaýǵa belsendi qatysyp, óz tańdaýyn jasaıdy degen úmittemin.
Serikbaı TURYMOV,
Senat depýtaty