«Amanat» partııasy Soltústik Qazaqstan oblystyq fılıaly delegattarynyń qatarynda partııanyń HHIV sezine jáne halyqtyq koalısııa qoldaýshylarynyń forýmyna qatysyp, aýylǵa úlken áser alyp oraldym. Ásirese Prezıdent Qasym-Jomart Toqaevtyń forýmda sóılegen sózi qazirgi ómirimizdiń shyndyǵyn aıtyp otyrǵandyǵynyń kýási boldym.
«Biz egemendigimizdi saqtaı alsaq qana ult bolyp, el bolyp otyra alamyz. Táýelsiz memleket qana óziniń tilin, jerin, dinin, dilin saqtap qala alady», dedi Prezıdent sózinde. Shynynda táýelsizdiktiń arqasynda ǵana qazaq halqy bıik asýlarǵa jetip otyr, qazir bizdi álem tanydy, qazaqtyń ónerine ǵalam qol soqty. Eger biz áli de bireýge selbesip júrgen bolsaq ulttyq qundylyqtarymyz eshkimge bilinbeı, ózimiz de ony qorǵaı almaı, jyldan-jalǵa joǵalyp keter edi. Ondaıdy biz bastan ótkizdik. Qazir sol joǵaltqandarymyzdy jańǵyrtýdamyz.
Prezıdent aıtqandaı «Táýelsizdik – bizdiń eń basty qundylyǵymyz». Barlyq Qazaqstan halqy bir jaǵadan bas, bir jeńnen qol shyǵaryp, Táýelsizdigimizdiń nyǵaıa túsýine qolymyzdan kelgen kómegimizdi jasaýymyz kerek. Bizdiń sharýashylyǵymyzda júzden artyq adam jumys isteıdi. Sharýashylyqtyń ortalyǵy – Noǵaıbaı aýyly, biz oǵan sharýashylyǵy turalap, jaǵdaılary júdep qalǵan Birlik, Dúıseke, Nadejka sekildi aýyldardyń da jerin turǵyndardyń ótinishterimen qosyp, barlyǵy 25 myń gektardaı jerge dán egemiz. Bıylǵy tabysymyz da mol boldy. Halyqqa tıesili paılaryn ýaqytynda berip jatyrmyz. Jerdi tabys kózi eken dep sora berýge bolmaıdy, ony únemi tyńaıtyp, jasańǵyratyp otyrý kerek. Biz parǵa qaldyrǵan jerge únemi mıneraldy tyńaıtqyshtar seýip, jerdi tyńaıtyp otyramyz. Jer kútýde bilimniń jetistikterin paıdalanýǵa tyrysamyz. Ǵylymnyń jetistikterin qoldanbasaq, jańa amal-tásilderdi engizbesek, bilikti mamandardy sharýashylyqqa tartpasaq, báribir artta qalǵan bolar edik. Sondyqtan biz osy iske qatty mán berip, aldyńǵy qatarly tehnıkalar men tehnologııalardy óndiriske engizip kelemiz. Prezıdent te osyny aıtyp, «Qazaqstan jahandyq ekonomıkadaǵy úrdisterge saı bolýǵa tıis. Bizge de osy ǵylymı-tehnologııalyq jańashyldyqty əkelip, óndiriske qosatyn jańa əri bilikti mamandar kerek», dedi.
Keshegi sózinde Prezıdent Q.Toqaev «Memleket múddesi degenimiz – halyqtyń múddesi. Sondyqtan barlyq sheshimder, jobalar, zańdar men jarǵylar el múddesin qorǵaýǵa arnalady. Týǵan elge janashyrlyq ər azamatqa tən qasıet bolýǵa tıis», dedi. Biz de týǵan elge janashyrlyq jasap, aýyldyń árbir turǵynyna sý tartyp berdik. Jylý da ortalyqtandyrylǵan. Qazir bizdiń sharýashylyqtaǵy aýyl úıleri qalanikinen kem emes. Úıge sý kelip turǵan soń sý jylytqyshty da, jyly ájethanany da bári ornatyp alǵan. Aýyldyń joly da jarqyraǵan tasjol. Qysy-jazy aýylǵa jete almaı qalý sııaqty problemalar artta qalǵan. Elge jasaǵan janashyrlyǵymyz da kózge ilinbeı qalǵan joq. 2018 jyly «Rýhanı jańǵyrý» baǵdarlamasy boıynsha berilgen «Jomart júrek» syılyǵyn, 2020 jyly «Halyqtyń súıiktisi» ulttyq syılyǵyn jáne sol jyly «Jyldyń úzdik fermeri» atalymy boıynsha respýblıkalyq syılyq aldyq. «Qurmet» ordenin de laıyqty dep tanyldyq. О́z basym osyndaı jetistiktermen Qasym-Jomart Kemeluly talap etken úrdiske saı bolamyz ǵoı dep sanaımyn. Aldaǵy saılaýǵa men óz kandıdatymdy naqty belgiledim. Ol bizdi týra jolǵa bastaýshy naǵyz kóshbasshymyz ekeni daýsyz.
Altynbek SAPAROV,
«Noǵaıbaı» JShS bas dırektory,
oblystyq máslıhat depýtaty
Soltústik Qazaqstan oblysy