Elordanyń tórinde ótken alqaly jıynnyń mańyzy zor. Azııadaǵy ózara yqpaldastyq jáne senim sharalary jónindegi keńestiń kezekti sammıtin ótkizýge bizdiń memleket bastamashy boldy. Elimizdiń dıplomatııalyq qyzmetine 30 jyl tolýymen tuspa-tus kelgen is-shara halyqaralyq saıası arenadaǵy mártebemizdi arttyra túskeni anyq. Álemde, alysqa barmaı-aq kórshi memleketterde geosaıası ahýal ýshyǵyp turǵan kezeńde dıplomatııalyq qatynastyń róli joǵary. Osy turǵydan qaraǵanda, atalǵan keńestiń mańyzdylyǵy zor deýge tolyq negiz bar.
Qazaqstan tóraǵa retindegi mıssııasyn áli eki jyl jalǵastyrady. Negizgi maqsat – memleketter arasyndaǵy qaqtyǵystyń aldyn alý. Keńestiń ishki baǵyttary da bar. Sonyń biri – saraptamalyq ortalyqtardyń forýmy. Munda túrli uıymdarǵa múshe halyqaralyq sarapshylar ıdeıalarymen, tájirıbelerimen bólisip, aımaqtyq qaýipsizdikti qalyptastyrý boıynsha usynystaryn ortaǵa salady. Sonymen qatar keńes sheńberinde ekonomıkalyq turǵydan mańyzdy jastar baǵytyndaǵy jumystardy atap ótýge bolady. Jalpy, atalǵan keńestiń memleketter arasyndaǵy qarym-qatynasty nyǵaıtýǵa, ortaq qaýip-qaterge qarsy turý boıynsha máselelerdi retteýge yqpaly zor.
Memleket basshysy Qasym-Jomart Toqaev óz sózinde negizgi baǵyttardy atap ótti. Ekonomıka, ekologııa, qaýipsizdik máselesi, bastysy – ǵalamdyq problemaǵa aınalǵan azyq-túlik qaýipsizdigi máselesin retteýge shaqyrdy. Bul rette, keńeske qatysqan memleketter arasynda jasyl dálizdi ashý usynysyn ortaǵa saldy. Keńestiń quramynda 27 memleket edi, endi Kýveıt te qatarǵa qosyldy. Keńes quramynyń artýy uıymnyń mártebesin arttyryp, geografııasyn keńeıte túsetini anyq.
Taǵy bir atap óterligi, Astana qalasy halyqaralyq deńgeıde beıbitshiliktiń ordasyna, bitimgershilikti júrgizýdiń basty alańyna aınalyp otyr. Elordada ótken sammıtke 11 memlekettiń basshylary keldi. Reseı Federasııasynyń Prezıdenti Vladımır Pýtınniń kelýin erekshe atap ótýge bolady. Keńestiń Reseı men Ýkraına arasyndaǵy qaqtyǵystyń beıbit túrde sheshilýine tıtteı de bolsyn úlesi bolsa, elimizdiń, Astananyń halyqaralyq arenadaǵy bedeli arta túsetini sózsiz.
Qazbek MAIGELDINOV,
Ulttyq quryltaı múshesi, saıasattanýshy